Ruhum düşdü əlimdən,
Dağıldı künc-bucağa.
İçimdən sökülənlər,
Yığışmır ki, qucağa
Nə sevinc var, nə kədər,
Nə qəribə haldı bu.
Məni görən deyəcək,
Bir gündə qocaldı bu.
Hamıdan gizlənmək üçün
Göyə qalxdım, quş oldum
Yenə gözə göründüm,
Bir ovçuya tuş oldum.
Ruh xəstə, can yaralı,
Məndən söz istəyirlər.
Üstümə korlar gəlir,
Sağlam göz istəyirlər.
Öz dərdini yükləmə,
Səndən betər haldayam.
Səpələnən ruhumu,
Toplamaq üçün yoldayam.
Xanım İsmayılqızı