Havadan danışır bir gözəl xanım.
"Yağış yağacaqdır, qar yağacaqdır.
Gah günəş çıxacaq, gah ay doğacaq,
Havalar tutulub-açılacaqdır".
Mənim günəşim də, ayım da sənsən,
Onu sinoptiklər nə bilir axı.
Sən bir az qıyqacı baxanda mənə,
Mənim gözlərimdə ildırım çaxır.
Bir güllü-çiçəkli bahar günündə,
Soyuq baxışınla qış gəlir sənin.
Mənim taleyimə yağışlar, yağır
Elə ki gözünə yaş gəlir sənin.
Söz var dolu kimi yağır başıma,
Söz var-duman olub yolumu kəsir.
Məndən inciyəndə, məndən küsəndə,
Qəlbimə sopsoyuq küləklər əsir.
Səni gözləyirəm, hələ bilmirəm
Yağış yağacaqmı, qar yağacaqmı,
Mənim bu eşqimin səmalarında,
Havalar tutulub-açılacaqmı?
Havadan danışır bir gözəl xanım.
Hardasa qar tökür, ya yağış yağır,
Hardasa ay batır, ya yağış yağır,
Mənim günəşim də, ayım da sənsən,
Onu sinoptiklər nə bilir axı?!
Baba Vəziroğlu