"Biz uydurma soyqırım siyasəti aparan Ermənistanın maraqlarını bu səmtə yönəldən və yalançı erməni siyasəti nəticəsində meydana gələn bu kimi addımları pisləyirik. Hesab edirik ki, tarixi ədalətsizliyə son verilməlidir". Bunu SİA-ya Milli Məclisin sədr müavini Bahar Muradova Macarıstanın Seqed şəhərində qondarma "erməni soyqırımı"na abidə qoyulmasına dair məsələyə münasibət bildirərkən deyib.
Bahar Muradova vurğulayıb ki, bir-birinin ardınca bu kimi addımları atan ölkələr tarixi hadisələrə bugünkü ermənilərin marağından yanaşmaya son qoymalıdırlar: "Bu ölkələr beynəlxalq hüququn prinsipləri, ölkələrin ərazi bütövlüyünə, onların suverenliyinə xələl gətirən hər hansı bir siyasətə yox deməyi bacarmalıdırlar. Hesab edirəm ki, Macarıstan dövləti bütün rəsmi siyasətini təcavükar planlar üzərində quran Ermənistanın əməllərinə alət olmamalıdır".
Qeyd edək ki, Qondarma "erməni soyqırımı"na abidə Macarıstanın Seqed şəhərinin Xristian Həmrəylik parkında, Seqed kilsəsinin yanında ucaldılıb. Açılış mərasimində iştirak edən Ermənistanın Macarıstandakı səfiri Levon Saqsyan bildirib ki, iki xalq arasındakı münasibətlər möhkəmdir və çətinliklər arxada qalıb. Macarıstanın xarici işlər naziri Janos Martoni isə deyib ki, ikitərəfli əlaqələr daha da genişləndirilməlidir.