Azərbaycanın "Azerspace-1" ilk telekommunikasiya peykinin orbitdəki bütün sınaq prosesləri uğurla başa çatıb. Aprelin 2-dən idarəetmə peykin istehsalçısı olan ABŞ-ın "Orbital Sciences" şirkəti tərəfindən tamamilə Rabitə və İnformasiya Texnologiyaları Nazirliyinin "Azərkosmos ASC"-yə təhvil verilib. Təhvilvermə əməliyyatları martın 15-dən aprelin 2-dək davam edib.
Nazirlikdən bildiriblər ki, Peyk kommersiya fəaliyyətinə başlamaq üçün artıq tam hazır vəziyyətdədir.
Hazırda "Azərkosmos"un mütəxəssisləri Əsas Yerüstü Peyk İdarəetmə Mərkəzindən peyki idarə edirlər və lazımi əməliyyatlar aparırlar. Peyk həmçinin Naxçıvan Muxtar Respublikasında yerləşən Ehtiyat Yerüstü Peyk İdarəetmə Mərkəzindən də izlənilə bilir.