Ermənistan prezidenti Serj Sarkisyan savadsızlığını nümayiş etdirərək bir daha özünü biyabır edib. SİA xarici mətbuata istinadən xəbər verir ki, çərşənbə axşamı seçki kompaniyası çərçivəsində Ermənistanın Malatya-Sepastia bölgəsinə gedən Sarkisyan Barak Obamanın dediyi " Böyük fəlakət" sözü ilə "qondarma erməni soyqırımı" sözünün eyni mənanı əks etdirdiyini deyib.
Onun sözlərinə görə, Obama "soyqırımı" kəliməsini deməsə belə, "Böyük fəlakət" sözü ilə öz düşüncəsini ifadə edib: "Onsuzda o "soyqırımı" sözünü işlətsəydi bu dəfə də dünya "Obama bu kəliməni niyə bir dəfə dedi?- deyə danışacaqdı".
Sarkisyan bu fikri səsləndirdikdən sonra ABŞ-dakı erməni diasporasının və erməni mətbuatının sərt reaksiyasına tuş gəlib. Belə ki, erməni mətbuatı Sarkisyanın bu addımı 18 fevralda keçiriləcək prezident seçkilərində öz "kreslosunu" qorumaq məqsədilə atdığını yazıb. ABŞ-dakı erməni diasporunun məhşur qəzetlərindən birində bu fikirlər ifadə olunub: "Soyqırımın nə demək olduğunu Sarkisyana başa salmaq lazımdır. Bu sahədə ona dərs keçmək vacibdir".
Ermənistanın tanınmış politoloqu Ara Kaçatoriyan isə Sarkisyanın sözlərinin erməni xalqına təhqir olduğunu deyib: "Əgər Sarkisyan həqiqətən də soyqırımı ifadəsilə "böyük fəlakət" sözlərinin mənasını eyni hesab edirsə, onda o Ermənistanı idarə etməməlidir. O bu savadsız düşüncə ilə erməni xalqının milli mübarizəsinə zərər verir".