Ermənilər kimdən və niyə qorxur?-ANALİZ

"Bizi kim qorxudub? Bir qrup oğrular və quldurlar dəstəsi. Robert Koçaryan kimdir? O, hazırda respublikamızdan da zəngin bir şəxsdir. Siz bunu bilirsiniz? Serj Sarkisyan da Ermənistandan varlı bir şəxsdir. Siz bilirsiniz? Ermənistan hakimiyyəti öz xalqına qarşı soyqırımı törətməkdə davam edir. Bu haqda Moskva qəzetləri yazırlar. Onlar bu qəzetləri məhkəməyə vermədilər. Ermənistanda isə bu cür məqalələri yazan jurnalistləri məhkəməyə verərdilər. Əgər siz kişisinizsə, Moskvadakıları da məhkəməyə verin". Ermənistan Milli Konqresinin lideri Levon Ter-Petrosyan səsləndirdiyi bu fikirlər başında terrorçu rejimin dayandığı ermənilərin aqibətinin acınacaqlı, dözülməz vəziyyətindən xəbər verir.

Ermənistanın üzləşdiyi problemlərin kökündə ölkədəki mövcud hakimiyyətin korrupsioner və kriminal xarakterli olmasıdır. Ermənistanda əsas iş adamları yalnız yüksək çinli məmurlardır. Ölkənin mövcud reallığı kontekstində hakimiyyətin və biznesin tam qovuşduğunu görmək mümkündür. Bu sistemdə biznesmenlər yalnız yüksək vəzifəli şəxslər olur.

Bütün bunların başında isə şəxsən ölkə prezident Serj Sarkisyan dayanır. Rusiya mətbuatında verilən siyahılara görə,prezident Sarkisyan ona etibarlı olan şəxslər, o cümlədən qardaşı Aleksandr və kürəkəni Mikael Minasyan onlarla müəssisə və şirkəti idarə edir. Kürəkəni M.Minasyan "ArmenAkob" və "Ay TV" teleşirkətlərinin sahibidir.

Rusiyanın aparıcı mətbu orqanlarından olan "Versiya" qəzetində dərc edilən "Ermənistan soyğunçuları - prezidentlərin mülkiyyəti" adlı məqalədə qeyd edilir ki, bir çox insanlar düşünə bilər ki, sərvətlərin talan edilməsi dövlət başçısı üçün görünməmiş bir haldır. Amma Ermənistanın sabiq prezidenti Robert Koçaryan, elə indiki prezident Serj Sarkisyan əllərinə düşən fürsətdən lazımınca istifadə ediblər. Faktlar sübut edir ki, hazırda onlar elə korrupsion sistem formalaşdırıblar ki, orada vicdanlı insana yer yoxdur.

Prezident Serj Sarkisyanın doğma qardaşı Aleksandr Sarkisyan deputat olmaqla yanaşı, həm də külli miqdarda var-dövlətə malik iş adamlarından biri kimi tanınır.

Ermənistan prezidenti Serj Sarkisyanın rejimi məğlubiyyət, uğursuzluq və cinayətlərini gizlətməyə, kriminal oliqarxiya ilə hakimiyyəti qəsb etmiş dəstənin legitimləşmə cəhdlərini müxtəlif bəlağət səviyyəsindəki bəyanatlarla pərdələməyə çalışır. İnsanları reallıqdan yayındırmaq üçünsə hakimiyyət hansısa yalanlara əl atmalı, insanların başlarını nə iləsə qatmalıdır. Bu isə Dağlıq Qarabağ problemidir ki, Sarkisyan iqtidarı üçün bu problem mövcudluğun yeganə təminatıdır.

Ermənistan xalqına gəldikdə - insanlar ölkənin 20 illik nisbi müstəqillik tarixində ən iyrənc və rəzil qarşıdurmalarda, sadəcə, statistik vahid qismində istifadə olunurlar. Sadə ermənin insan kimi yaşamaq üçün heç bir şansı yoxdur.

İbtidai icma quruluşu, quldarlıq və feodalizmdən fərqli olaraq, indi istənilən ölkənin yaşadığı şəraitin səviyyəsini müəyyənləşdirən ünsürlərdən biri də bankların fəaliyyəti, bankinq sisteminin durumudur. Ermənistanın Mərkəzi Bankının məlumatına görə, ölkədəki kommersiya banklarının aktivləri hazırda 2 trilyon 37 milyard dram və ya təqribən 5,2 milyard dollardır. Ötən ilin müvafiq dövrü ilə müqayisədə kommersiya banklarının aktivləri 30 milyard dram azalıb.

Ölkədəki bankinq sisteminin bərbad vəziyyətdə olmasını kommersiya banklarının aktivlərinin çoxunu kreditlərin təşkil etməsi də aşkar göstərir. Belə ki, 1,25 trilyon dram və ya bütün aktivlərin təxminən 61 faizi kreditlərdir.

Hüquqi şəxslərə verilmiş kreditlərin ümumi məbləği təxminən 777 milyard dramdır.

Prezidentin çirkli pulları necə yuyulur?

Sarkisyan rejimi ölkədəki maliyyə vəsaiti dövriyyəsi və daxili investisiyaların artmasından bəhs edərək iqtisadi inkişafın olduğunu deyir. Lakin rəqəmlər tam tərsini göstərir.

Rəsmi statistika belə, daxili investisiyalar həcminin son illər fasiləsiz azaldığını etiraf edir, çünki belə rəqəmləri bütün səylərə və saxtalaşdırmalara rəğmən, gizləmək çox çətin, hətta mümkünsüzdür. Hüquqi şəxslərə verilən kreditlərin tam əksəriyyəti, daha doğrusu, təxminən 82 faizi kriminal oliqarxiyanın inhisarında olan iqtisadiyyat və sənaye sahələrindəki şirkətlər, strukturlar və müəssisələrin payına düşür. Bankinq sistemi müstəqil olmadığından kredit faizləri çox yüksəkdir və bankların ayırdıqları maliyyə vəsaitləri faktiki olaraq pulu alan strukturların hansısa konkret layihəni reallaşdırmaları əvəzinə, əksər hallarda mərhələli proqramların icrasına sərf olunur.

Rəsmi baxımdan sənədləşdirmələr qaydasındadır və ölkədə keçirilən primitiv audit təftişləri pulların məqsədli şəkildə xərclənməsi ilə yanaşı, ayırmaların işləndiyini göstərir. Ermənistan iqtidarındakı yüksəkçinli məmurların birbaşa nəzarətində olan, lakin üzdə müstəqil maliyyə-bankinq strukturu kimi təqdim edilərək guya fəaliyyət göstərən bankların total əksəriyyəti çirkli pulların yuyularaq təmizlənməsi, başında Serj Sarkisyanın durduğu çoxşaxəli mütəşəkkil cinayətkarlığın kriminal gəlirlərinin legitimləşdirilməsi ilə məşğuldur.

Belə tələblərə riayət etməyən banklar isə ölkədə ümumiyyətlə mövcud deyil.