Azərbaycan Respublikasının Prezidenti yanında Dövlət Qulluğu Məsələləri üzrə Komissiya Dövlət Qulluqçularının Peşə Bayramı Gününə və Beynəlxalq Dövlət Qulluğu Gününə həsr
olunan "Azərbaycan Respublikasında dövlət qulluğunun aktual problemləri" mövzusunda
elmi-praktik konfrans keçiriblər. SİA-nın xəbərinə görə, konfransda Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın əməkdaşları, DİA-nın professor–müəllim heyəti və müdavimləri, mərkəzi icra hakimiyyəti və məhkəmə hakimiyyəti orqanlarının məsul işçiləri iştirak ediblər.
Konfransı giriş sözü ilə açan Azərbaycan Respublikasının Prezidenti yanında Dövlət
İdarəçilik Akademiyasının rektoru, akademik Urxan Ələkbərov Azərbaycanda dövlət qulluğu
tarixindən danışaraq qeyd edib ki, məhz ümummilli lider Heydər Əliyev Azərbaycanda
hakimiyyətə gəldikdən sonra dövlət qulluğu sistemi və onun hüquqi bazası formalaşdırılıb.
"Dövlət qulluğu: 2007-2012-ci illər – nailiyyətlər və hədəflər" mövzusunda çıxış
edən Azərbaycan Respublikasının Prezidenti yanında Dövlət Qulluğu Məsələləri üzrə
Komissiyanın sədri Bəhram Xəlilov qeyd edib ki, ilk dəfə "dövlət qulluğu" anlayışı
Azərbaycan müstəqillik əldə etdikdən sonra məhz ulu öndər Heydər Əliyevin rəhbərliyi ilə
hazırlanan və 1995-ci il noyabrın 12-də keçirilmiş referendumda xalqın iradəsi ilə qəbul edilən
Konstitusiyada öz əksini tapıb. Qeyd edilib ki, ölkədə aparılan dövlət qulluğu
siyasətinin əsas qayəsini ölkəmizdə məsuliyyətli və demokratik idarəçiliyin yaradılması,
dövlət orqanlarının fəaliyyətində çevikliyin və şəffaflığın gücləndirilməsi, vətəndaşların
qayğı və ehtiyaclarının daha dolğun təmin edilməsi, habelə dövlət orqanlarının üzərinə düşən
funksiyaları səmərəli şəkildə yerinə yetirilməsinə xidmət edən təcrübəli və peşəkar dövlət
qulluqçusu korpusunun formalaşdırılması təşkil edir. Belə bir korpusun formalaşdırılması
üçün dövlət qulluğuna qəbulla bağlı tətbiq edilən yeniliklərdən danışan natiq gənclərin dövlət
qulluğuna cəlb edilməsi, Azərbaycan Respublikasının Prezidenti İlham Əliyevin rəhbərliyi ilə
hazırlanan və uğurla həyata keçirilən "Elektron Azərbaycan" Dövlət Proqramı, İKT-nin dövlət qulluğunda tətbiqinin əhəmiyyəti və bu sahədə Komissiyanın gördüyü işlər barədə, o cümlədən də dövlət qulluqçularının İKT sahəsində təlimlərə cəlb edilməsi barədə gördüyü işlər barədə məlumat verib.
Sonra Akademiyanın I prorektoru professor Əlikram Abdullayev "Dövlət orqanlarının
kadr potensialı milli təhlükəsizlik amili kimi", Dövlət idarəçiliyində informasiya
texnologiyaları kafedrasının dosenti Ağamehdi Mehdiəliyev "Dövlət qulluqçusu yeni
informasiya məkanında" mövzularında çıxış edib, dövlət qulluğunda rast gəlinən problemlər
və onların həlli yolları barədə konfrans iştirakçıları ilə öz fikirlərini bölüşüblər. Konfransda
Akademiyanın təhsil portalıının təqdimatı da olub. Konfransın sonunda BMT-nin İctimai
İnformasiya Departamentinin nümayəndəsi Envera Səlimoviç çıxış edərək gənclərin dövlət
qulluğuna cəlb edilməsi ilə bağlı görülən işləri təqdirəlayiq hal kimi qiymətləndirib.