Bu ərəfədə yarışmanın yarımfinalları və finalındakı açılış və interval aktlarının məşqləri aparılır. Şounun bu ilki təmsilçilərinin rəngarəng və bir-birindən fərqlənən performansları ilə yanaşı, milyonlarla izləyiciyə açılış və interval aktlarında sürpriz dolu şoular təqdim ediləcək.
Açılış və interval aktları səhnə tərtibatı, ssenarisi və şouda çıxış edəcək müğənniləri ilə seçiləcək. Bu şoular üçün son 5 ilin qalibləri Bakıda toplaşacaq. Mariya Şerifoviç, Dima Bilan, Aleksandr Rıbak, Lena, Eldar və Nigar mayın 24-də keçiriləcək ikinci yarımfinalın interval aktında \"Bakı Kristal Zalı\"nda çıxış edəcək. Eurovision Mahnı Müsabiqəsinin bu qaliblərindən ibarət qrup Azərbaycanın milli musiqisi ilə zəngin performansla səhnədə olacaqlar. Eurovision ulduzları bu şouda tamaşaçılar qarşısına indiyədək görmədiyimiz bir üslubda çıxış edəcəklər. Mayın 18-dən etibarən Eurovision Mahnı Müsabiqəsinin ötən 5 ilin qalibləri Bakıya gələcək.
Xatırladaq ki, Eurovision Mahnı Müsabiqəsi 2012-nin yarımfinalları mayın 22, 24-də, finalı isə mayın 26-da keçiriləcək.