Unibank Premyer Liqasının XXV turu Azərbaycan çempionatlarının liderliyini əldə saxlayan "Qarabağ" və "Neftçi" klubları üçün əlamətdar olacaq. Siasport.az saytının məlumatına görə, XXV tur çərçivəsində keçiriləcək qarşılaşmalar hər iki klub üçün yubiley xarakteri daşıyır. Məlumat üçün bildirək ki, ölkə birinciliklərinin hamısının iştirakçısı olan 3 komandadan ikisi özləri üçün yubiley matçına çıxacaqlar. İndiyədək Premyer Liqada hamıdan çox – 549 matç keçirən "Neftçi" və "Qarabağ" 550-ci çempionat matçında qüvvəsini sınayacaq.