"Prezidentin YAP-ın Qurultayında səsləndirdiyi fikirlər Azərbaycanın dəyişən geosiyasi şəraitdə təhlükəsizlik və xarici siyasət prioritetlərini aydın şəkildə ortaya qoyur. Dövlət başçısının ölkəyə qarşı yönələn təzyiqlərə qətiyyətli cavab verilməsi ilə bağlı mövqeyi təkcə siyasi bəyanat deyil, həm də Azərbaycanın suveren qərarvermə prinsipinə əsaslanan dövlət strategiyasının ifadəsidir. Prezident vurğulayıb ki, Azərbaycan özünə qarşı hər hansı təzyiqi cavabsız qoymur və ölkənin müstəqil siyasətinə kənardan müdaxiləni qəbul etmir".
Bunu SİA-ya açıqlamasında politoloq Rəşad Bayramov deyib.
Onun sözlərinə görə, bu yanaşmanın əsas səbəblərindən biri Azərbaycanın son illərdə regionda dəyişən güc balansı fonunda mövqeyini möhkəmləndirməsidir. Ərazi bütövlüyünün və suverenliyin bərpasından sonra ölkə qarşısında yeni vəzifələr yaranıb. Artıq məsələ yalnız əldə olunmuş nəticələri qorumaq deyil, həm də regional təhlükəsizliyin, iqtisadi müstəqilliyin və strateji tərəfdaşlıqların davamlılığını təmin etməkdir. Bu baxımdan müdafiə qabiliyyətinin gücləndirilməsi, sərhəd təhlükəsizliyi və xarici təhdidlərə qarşı hazırlıq dövlət siyasətinin mühüm istiqamətləri kimi çıxış edir:
"Azərbaycanın qətiyyətli mövqeyi digər dövlətlərlə münasibətlərinə də təsir göstərir. Bir tərəfdən, bu siyasət ölkənin milli maraqlarını müdafiə etmək əzmini nümayiş etdirir və mümkün təzyiqlərin qarşısını almağa yönəlir. Digər tərəfdən, regional və beynəlxalq tərəfdaşlara Azərbaycanın xarici siyasətində müstəqil qərarların əsas götürüldüyü mesajını verir.
Azərbaycanın enerji və nəqliyyat sahələrində artan əhəmiyyəti bu siyasətin əlavə dayaqlarını formalaşdırır. Avropanın enerji təhlükəsizliyində, Şərq–Qərb nəqliyyat marşrutlarında və Xəzər hövzəsində əməkdaşlıqda ölkəmizin rolu Azərbaycanın beynəlxalq tərəfdaşlarla münasibətlərində imkanlarını genişləndirir. Prezident İlham Əliyevin çıxışında enerji təhlükəsizliyinin milli təhlükəsizliklə əlaqələndirilməsi də bu reallığın siyasi ifadəsidir.
Bununla yanaşı, müasir geosiyasi şəraitdə təhdidlər yalnız hərbi xarakter daşımır. İnformasiya manipulyasiyaları, kiberhücumlar, iqtisadi təzyiqlər və ideoloji təsir cəhdləri də dövlətlərin sabitliyinə təsir göstərə bilər. Buna görə təhlükəsizlik siyasətinin hərbi hazırlıqla yanaşı, iqtisadi dayanıqlılıq, texnoloji imkanlar və informasiya savadlılığı ilə də tamamlanması vacibdir. Ümumiləşdirərək deyim ki, Azərbaycanın təhdidlərə qətiyyətli cavab vermək siyasəti ölkənin regional mövqeyini möhkəmləndirməyə və suveren qərarvermə imkanlarını qorumağa xidmət edir".