"FIFA prezidenti Canni İnfantinonun Azərbaycana səfəri və ölkəmizin qarşıdakı illərdə iki mühüm beynəlxalq futbol yarışına ev sahibliyi etməsi Azərbaycan futbolunun inkişafı baxımından xüsusi əhəmiyyət daşıyır. Söhbət 2026-cı ilin oktyabrında Bakıda ilk dəfə keçiriləcək FIFA U-15 Dünya Çempionatı və Festivalından, eləcə də 2027-ci ildə Azərbaycan və Özbəkistanın birgə təşkilatçılığı ilə keçiriləcək FIFA U-20 Dünya Çempionatından gedir".
Bu sözləri SİA -ya açıqlamasında deputat Könül Nurullayeva deyib.
Onun sözlərinə görə, sentyabrın 29-da FIFA prezidenti Canni İnfantino Prezident İlham Əliyevlə görüşdə Azərbaycanda futbolun inkişafı, FIFA ilə əməkdaşlığın perspektivləri və qarşıdakı mötəbər yarışlara hazırlıq məsələləri müzakirə olundu:
"Prezident İlham Əliyev U-15 və U-20 dünya çempionatlarının Azərbaycan futbolunun və bütövlükdə region futbolunun inkişafına töhfə verəcəyinə ümidvar olduğunu bildirib. Bu səfərin diqqətçəkən məqamlarından biri odur ki, FIFA prezidenti birbaşa yarışın keçiriləcəyi infrastrukturu da nəzərdən keçirib. Burada 10 futbol meydançasının yaradılması nəzərdə tutulur və kompleks U-15 dünya çempionatının oyunlarına ev sahibliyi edəcək.
Əslində, qarşıdakı yarışların Azərbaycan futbolu üçün ən mühüm tərəfi onların nəticəsindən daha çox yaratdığı inkişaf imkanlarıdır. Çünki futbolun uzunmüddətli uğuru yalnız əsas milli komandanın nəticələri ilə ölçülmür. Bunun təməlində uşaq və yeniyetmə futbolu, akademiyalar, məşqçi hazırlığı, seleksiya sistemi, futbol infrastrukturu və istedadların vaxtında müəyyənləşdirilməsi dayanır.
FIFA-nın yeni U-15 Dünya Çempionatı və Festivalı da məhz bu fəlsəfəyə əsaslanır. İlk turnir 2026-cı il oktyabrın 22-dən Bakıda keçiriləcək və FIFA-nın 211 üzv assosiasiyasının iştirakına imkan yaradılıb. FIFA-nın məlumatına görə, yarış çərçivəsində 3 mindən çox futbolçu, məşqçi və rəsmisi Bakıya gələcək, təxminən 1000 oyun keçiriləcək. Bu isə dünyanın müxtəlif futbol məktəblərini bir məkanda müşahidə etmək imkanıdır. Yerli məşqçilər və gənc futbolçular fərqli futbol fəlsəfələri, taktiki yanaşmalar və hazırlıq metodları ilə daha yaxından tanış ola biləcəklər.
Burada xüsusilə vacib məqam ondan ibarətdir ki, Azərbaycan futbolu üçün belə yarışlar həm də təcrübə mübadiləsi platforması rolunu oynaya bilər. Dünya futbolunun müxtəlif məktəblərindən gələn mütəxəssislərlə əlaqələrin genişləndirilməsi gələcəkdə məşqçi hazırlığına, akademiyaların fəaliyyətinə və seleksiya sisteminə müsbət təsir göstərir.
2027-ci ildə keçiriləcək FIFA U-20 Dünya Çempionatı isə bu prosesin daha yüksək mərhələsidir. Azərbaycan və Özbəkistanın birgə ev sahibliyi edəcəyi turnirdə 24 milli komandanın iştirakı nəzərdə tutulur.
U-20 səviyyəsi futbolçuların peşəkar karyeraya keçidində xüsusi mərhələdir. Bu yaş qrupunda artıq yüksək səviyyəli futbolçular formalaşır və dünya futbolunun aparıcı klubları belə turnirləri istedadların izlənilməsi baxımından diqqətlə müşahidə edir.
Azərbaycanın bu yarışa ev sahibliyi etməsi yerli gənclər üçün də mühüm təcrübədir. Onlar dünyanın müxtəlif ölkələrindən olan həmyaşıdları ilə eyni futbol mühitində olmaq, yüksək səviyyəli qarşılaşmaları izləmək və beynəlxalq futbol atmosferini yaxından hiss etmək imkanı qazanacaqlar.
Böyük turnirlərin ən mühüm irslərindən biri də yaradılan və yenilənən infrastrukturdur.
Bu baxımdan Hövsanda yaradılan futbol kompleksinin əhəmiyyəti yalnız qarşıdakı U-15 turniri ilə məhdudlaşmır. Onun gələcəkdə futbol akademiyalarının, uşaq liqalarının, seleksiya proqramlarının və müxtəlif yaş qrupları üzrə hazırlıq prosesinin istifadəsinə verilməsi Azərbaycan futbolunun aşağı yaş qruplarının inkişafına əlavə imkanlar yaradacaq.
Canni İnfantinonun Bakıya səfəri həm də Azərbaycan-FIFA münasibətlərində futbolun inkişafına yönəlmiş əməkdaşlığın əhəmiyyətini göstərir. Prezident İlham Əliyevlə görüşdə də tərəflər Azərbaycan futbolunun inkişafı istiqamətində görülən işləri, əldə olunan nəticələri və gələcək əməkdaşlıq perspektivlərini müzakirə ediblər.
Bu əməkdaşlığın praktik nəticəsi isə beynəlxalq yarışların təşkilindən daha geniş ola bilər. Əsas məsələ FIFA-nın imkanlarından və beynəlxalq təcrübəsindən Azərbaycan futbolunun aşağı yaş qruplarının inkişafında, məşqçi və hakim hazırlığında, futbol idarəçiliyində və infrastrukturun səmərəli istifadəsində maksimum yararlanmaqdır.
Beləliklə, dünya çempionatları Azərbaycan üçün həm ev sahibliyi etdiyi yarışlar, həm də futbol sisteminin inkişafına xidmət edən böyük bir təcrübədir.
Azərbaycanın son illərdə beynəlxalq idman tədbirlərinin təşkilində qazandığı təcrübə də bu proses üçün mühüm üstünlük yaradır. U-15 Dünya Çempionatı və Festivalının ilk dəfə məhz Azərbaycanda keçirilməsi ölkənin beynəlxalq futbol xəritəsində görünürlüğünü artıran amillərdən biridir. FIFA da Bakının bu yarış üçün yüksək səviyyəli infrastruktura malik olmasını əsas məqamlardan biri kimi qeyd edib.
Belə tədbirlər ölkəyə gələn idmançıların, məşqçilərin və futbol mütəxəssislərinin Azərbaycanla tanışlığı baxımından da əhəmiyyətlidir. Bu baxımdan idman diplomatiyası Azərbaycanın beynəlxalq əlaqələrinin daha da genişləndirilməsinə xidmət edir".