"Yeni geyim tələblərinin məktəblərdə təsiri yalnız geyimlə məhdudlaşmayacaq. Düzgün tətbiq olunsa, intizamın, məktəb mədəniyyətinin və təhsil mühitinin formalaşmasına müsbət təsir göstərə bilər". Bu fikirləri SİA-ya açıqlamasında təhsil eksperti Rizvan Fikrətoğlu bildirib.
Onun sözlərinə görə, burada əsas məqam intizam məsələsidir: "Yeni geyim qaydalarının aydın olması şagirdlərdə məktəb daxilində davranış və məsuliyyət hissini gücləndirə bilər. Təhsil mühitinə gəlincə, məktəbdə diqqətin xarici görünüşdən daha çox dərsə və təlim prosesinə yönəlməsinə şərait yarada bilər.
Bərabərlik məsələsi də var. Standartlaşdırılmış yanaşma şagirdlər arasında geyim və maddi imkanlarla bağlı fərqlərin daha az nəzərə çarpmasına kömək edə bilər. Həmçinin burada müəllim nümunəsi də mühüm rol oynayır. Təhsil verənlərin də müəyyən peşəkar geyim standartlarına əməl etməsi məktəbdə müəllim-şagird münasibətlərində peşəkarlıq təsəvvürünü gücləndirə bilər.
Yeri gəlmişkən, burada risk məsələsi də var. Qaydalar həddindən artıq sərt və cəzalandırıcı şəkildə tətbiq edilərsə, əsas məqsəd olan təhsil ikinci plana keçə bilər. Buna görə də tələblər aydın, ölçülü və bütün məktəblərdə eyni prinsiplərlə tətbiq olunmalıdır.
Məncə, burada əsas məsələ “Şagird necə geyinməlidir?” sualından daha çox “Məktəbdə hansı təhsil mədəniyyətini formalaşdırmaq istəyirik?” sualıdır. Geyim qaydası həmin mədəniyyətin yalnız bir hissəsidir. Yüksək nəticəli təhsil mühiti isə ilk növbədə müəllimin münasibəti, məktəb rəhbərliyinin idarəçiliyi və şagirdə göstərilən hörmət əsasında formalaşır".