_(1).jpg)
"Vətən müharibəsində Silahlı Qüvvələrimizin əldə etdiyi qələbə müasir Azərbaycan tarixinin mühüm hadisələrindən biridir. Bu zəfər dövlətimiz və xalqımız üçün hərbi, siyasi və mənəvi baxımdan böyük əhəmiyyət daşıyır. Vətən müharibəsində qələbənin ən mühüm nəticəsi uzun illər işğal altında olan torpaqlarımızın azad edilməsi və Azərbaycanın ərazi bütövlüyünün bərpası oldu".
Bu sözləri SİA-ya açıqlamasında hərbi-ekspert Ədalət Verdiyev deyib.
Onun sözlərinə görə, Azərbaycan öz hərbi imkanları hesabına BMT Təhlükəsizlik Şurasının qəbul etdiyi və uzun müddət icra olunmayan qətnamələrin yerinə yetirilməsini təmin etdi. Vətən müharibəsindən sonra əldə olunan razılaşmaların icrası istiqamətində də Azərbaycanın mövqeyi həlledici oldu. Sonrakı mərhələdə həyata keçirilən tədbirlər nəticəsində ölkəmizin ərazi bütövlüyünün və dövlət suverenliyinin tam bərpası təmin edildi:
"Azərbaycan Ordusunun əldə etdiyi qələbə eyni zamanda müasir hərbi texnologiyaların və yeni nəsil müharibə metodlarının tətbiqi baxımından da diqqət çəkdi. Vətən müharibəsi zamanı həyata keçirilən əməliyyatlar, istifadə olunan hərbi texnologiyalar və taktiki yanaşmalar müxtəlif ölkələrin hərbi ekspertləri və araşdırma mərkəzləri tərəfindən öyrənilib. Azərbaycan Ordusunun döyüş təcrübəsinin hərbi təhsil müəssisələrində də araşdırıldığı və müxtəlif ölkələrin hərbi hazırlıq prosesində nümunə kimi təqdim edildiyi bildirilir.
2023-cü ildə həyata keçirilən antiterror tədbirləri də Azərbaycanın dövlət suverenliyinin tam bərpası baxımından mühüm mərhələ oldu. Bu proses nəticəsində Qarabağda fəaliyyət göstərən separatçı silahlı birləşmələrin tərksilah edilməsi və Azərbaycan dövlətinin nəzarətinin bütün ərazilərində təmin olunması baş verdi.
Qələbənin digər mühüm nəticələrindən biri regionun geosiyasi və nəqliyyat xəritəsində baş verən dəyişikliklərdir. Azərbaycanı Naxçıvanla birləşdirəcək Zəngəzur dəhlizinin reallaşdırılması məsələsi hazırda müxtəlif ölkələrin diqqət mərkəzindədir. Bu istiqamətdə aparılan proseslər Azərbaycanın regional nəqliyyat əlaqələrində rolunu artıran amillərdən biri kimi qiymətləndirilə bilər.
Bütün bu nailiyyətlərin əldə olunmasında Azərbaycan Ordusunun, hərbi qulluqçuların və döyüşçülərin mühüm rolu olub. Bu baxımdan Vətən müharibəsində həlak olan şəhidlərimizin, yaralanan hərbçilərimizin və veteranlarımızın xidmətləri xüsusi qeyd edilməlidir. Onların fədakarlığı Azərbaycanın ərazi bütövlüyünün və dövlət suverenliyinin bərpası prosesində mühüm yer tutur".