Sentyabrın 20-də Qaradağ rayonunun Lökbatan qəsəbəsində 20 sentyabr 1992-ci ildə itkin düşmüş 2024-cü ilin sentyabrında qalıqları tapılaraq Lökbatan qəsəbəsi Şəhidlər Xiyabanında dəfn olunmuş şəhid Rüstəmov Tərlan Kamal oğlunun ildönümü ilə əlaqədar anım mərasimi keçirilib.
Şəhidin anım mərasimində Qaradağ Rayon İcra Hakimiyyəti başçısının səlahiyyətlərini icra edən, başçının birinci müavini Emil Abbasov, YAP Qaradağ rayon təşkilatının sədri İlqar İlyasov, Qərbi Azərbaycan İcması Qaradağ rayon təşkilatı sədrinin müavini İbad Mehdiyev, şəhidin ailə üzvləri, qazilər və ictimaiyyətin nümayəndələri şəhidin məzarını ziyarət edərək ruhuna dualar oxumuşlar.
Qaradağ rayon İcra Hakimiyyəti başçısının səlahiyyətlərini icra edən, başçının birinci müavini Emil Abbasov, YAP Qaradağ rayon təşkilatının sədri İlqar İlyasov və Qərbi Azərbaycan İcması Qaradağ rayon təşkilatı sədrinin müavini İbad Mehdiyev mərasimdə çıxış edərək şəhidin ailəsinə baş sağlığı vermiş və vətən üçün canından keçən övladlarımızın heç zaman unudulmayacağını bildirmişlər. Ölkə rəhbərliyinin şəhid ailələrinə daimi diqqət və qayğı göstərdiyi və bunun davamlı olacağı ziyarət iştirakçılarının diqqətinə çatdırmışlar.
Qeyd edək ki, Tərlan Rüstəmov 1974-cü il martın 20-də Lerik rayonun Şivlə kəndində anadan olub. O, 1992-ci il sentyabrın 20-də Ağdam rayonunun Sırxavənd kəndində itkin düşüb. Şəhidin nəşinin qalıqları həmin kənddə aşkar olunub.
Şəhidin ailə üzvləri şəhid ailələrinə göstərdikləri diqqət və qayğıya görə Azərbaycan Respublikasının Prezidenti cənab İlham Əliyevə və Azərbaycan Respublikasının Birinci vitse-prezidenti Mehriban xanım Əliyevaya öz minnətdarlıqlarını ifadə ediblər.
Vətən yolunda canından keçən şəhidlərimiz hər zaman qəlbimizdə yaşayacaq və onların qanlarıyla azad etdikləri torpaqlarımızı göz bəbəyi kimi qoruyacağıq. Şəhidlərimizlə qürur duyur, onlara Allahdan rəhmət, ailələrinə səbir diləyirik.