Sentyabrın 14-də Yeni Azərbaycan Partiyası (YAP) Masallı rayon təşkilatının XI konfransı keçirilib.
Əvvəlcə xalqımızın Ümummilli Lideri Heydər Əliyevin abidəsi ziyarət edilib, abidənin önünə gül dəstələri düzülüb.
Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.
Konfransda YAP Masallı rayon təşkilatının sədri Seyfəddin Əliyev hesabat məruzəsi ilə çıxış edib. O, ötən dövr ərzində təşkilat tərəfindən həyata keçirilən işlər, rayonda reallaşdırılan ictimai-siyasi tədbirlər və partiya üzvlərinin ictimai proseslərdə fəal iştirakı barədə məlumat verib. Bildirilib ki, təşkilatın fəaliyyəti partiyanın qarşıya qoyduğu məqsəd və vəzifələrə uyğun olaraq davam etdirilib. Rayon təşkilatının ötən müddət ərzində sıralarını genişləndirdiyini deyən S.Əliyev qeyd edib ki, əldə olunan nailiyyətlərlə yanaşı, növbəti mərhələdə də qarşıda məsuliyyətli vəzifələr dayanır.
Masallı Rayon İcra Hakimiyyətinin başçısı Araz Əhmədov Prezident İlham Əliyevin rəhbərliyi ilə ölkədə həyata keçirilən ardıcıl və məqsədyönlü siyasət, sosial-iqtisadi inkişaf, genişmiqyaslı islahatlar və reallaşdırılan sosial layihələr barədə danışıb. O bildirib ki, son illər görülən işlər ölkənin hərtərəfli inkişafına, əhalinin sosial rifahının yüksəldilməsinə və regionların inkişafına mühüm töhfə verib.
Milli Məclisin deputatı Məşhur Məmmədov Ulu Öndər Heydər Əliyevin fikirlərinə istinad edərək, Yeni Azərbaycan Partiyasının dünənin, bu günün və gələcəyin partiyası olaraq fəaliyyət göstərdiyini deyib. Onun sözlərinə görə, torpaqlarımızın işğaldan azad olunması və Azərbaycanın ərazi bütövlüyünün, eləcə də suverenliyinin tam bərpa edilməsi partiyanın uğurlu siyasi fəaliyyətinin əsas nəticəsidir.
Daha sonra Rafiq Əlihəsənov adına 1 saylı tam orta məktəb ərazi partiya təşkilatının sədri, şəhid anası Mehriban Sultanova, Masallı Dövlət Aqrar İnkişaf Mərkəzi ərazi partiya təşkilatının sədri Seymur Nuriyev, Masallı rayon Heydər Əliyev Mərkəzinin direktoru Dilbər İbayeva, Azərbaycan Qarabağ Müharibəsi Əlilləri, Veteranları və Şəhid Ailələri İctimai Birliyi Masallı filialının sədri Nahid Rəhimov, Mahmudavar ərazi partiya təşkilatının sədri Kinəxanım Əliyeva çıxış edərək Azərbaycanın müstəqillik dövründə qazandığı bütün nailiyyətlərdə YAP-ın imzasının olduğunu deyiblər.
YAP Mərkəzi Aparatının Təşkilat şöbəsinin baş məsləhətçisi Əli Axundov bildirib ki, Yeni Azərbaycan Partiyası bütün dövrlərdə xalqın iradəsini və dövlətçilik maraqlarını əsas götürüb. O qeyd edib ki, partiyanın ardıcıl və məqsədyönlü fəaliyyəti onun cəmiyyət arasında nüfuzunun daha da möhkəmlənməsinə, xalqın YAP-a olan inamının davamlı şəkildə artmasına səbəb olub.
Konfransda YAP Masallı rayon təşkilatının hesabat dövründəki fəaliyyəti qənaətbəxş qiymətləndirilib və Yeni Azərbaycan Partiyasının VIII Qurultayına nümayəndələr seçilib.
Sonda Yeni Azərbaycan Partiyasının Himni səsləndirilib.