Onun sözlərinə görə, müxtəlif ölkələrin diplomatik nümayəndələrinin Xankəndiyə səfər etməsi Azərbaycanın ərazi bütövlüyü və suverenliyinin praktik müstəvidə qəbulunun göstəricilərindən biri kimi qiymətləndirilə bilər:“Hikmət Hacıyevin Xankəndiyə səfərini son dövrlərdə xarici diplomatların və beynəlxalq nümayəndələrin Qarabağa, xüsusilə Xankəndiyə səfərlərinin artması fonunda qiymətləndirmək daha məqsədəuyğundur. Burada söhbət yalnız ayrı-ayrı diplomatik səfərlərdən getmir. Bu proses Azərbaycanın suverenliyinin və postmünaqişə reallığının beynəlxalq diplomatik müstəvidə getdikcə daha aydın şəkildə qəbul olunduğunu göstərən mühüm amillərdən biridir”.
SİA xəbər verir ki, bunu politoloq Tural İsmayılov açıqlamasında deyib.
Onun sözlərinə görə, müxtəlif ölkələrin diplomatik nümayəndələrinin Xankəndiyə səfər etməsi Azərbaycanın ərazi bütövlüyü və suverenliyinin praktik müstəvidə qəbulunun göstəricilərindən biri kimi qiymətləndirilə bilər:
”Əgər əvvəlki dövrdə Qarabağ məsələsi beynəlxalq platformalarda əsasən münaqişə, təhlükəsizlik və status məsələləri çərçivəsində müzakirə olunurdusa, hazırda bu yanaşmada ciddi dəyişiklik müşahidə edilir.
Politoloq bildirib ki, diplomatik nümayəndələrin Xankəndidə olması şəhərin Azərbaycanın siyasi, hüquqi və inzibati məkanının tərkib hissəsi kimi qəbul edilməsini nümayiş etdirən yeni diplomatik reallıq formalaşdırır.
Bu baxımdan Hikmət Hacıyevin Xankəndiyə səfəri də xüsusi siyasi əhəmiyyət daşıyır. Prezident Administrasiyasının Xarici siyasət məsələləri şöbəsinin müdiri kimi o, Azərbaycanın xarici siyasət kursunun əsas kommunikatorlarından biridir. Hacıyevin Xankəndidə iştirakı Azərbaycanın xarici siyasət mesajlarının məhz Qarabağdan, suverenliyin bərpa olunduğu ərazidən çatdırılması baxımından diqqətçəkəndir.
Tural İsmayılovun sözlərinə görə, Azərbaycan bununla öz diplomatik gündəliyini yalnız paytaxtlardan və beynəlxalq platformalardan deyil, suverenliyini bərpa etdiyi ərazilərdən də nümayiş etdirir.
Politoloq qeyd edib ki, hazırda Xankəndinin beynəlxalq gündəmdəki təqdimatında da dəyişiklik baş verir. Şəhər əvvəlki kimi münaqişənin statusu və siyasi gələcəyi ilə bağlı müzakirələrin mərkəzi kimi deyil, Azərbaycanın dövlət idarəçiliyi, regional inkişaf və reinteqrasiya siyasətinin tərkib hissəsi kimi gündəmə gəlir. Xarici diplomatların bu əraziyə səfərləri də həmin yeni reallığın beynəlxalq auditoriyaya çatdırılması baxımından mühüm əhəmiyyət daşıyır.
O vurğulayıb ki, diplomatik protokol baxımından da belə səfərləri təsadüfi hadisə kimi qiymətləndirmək olmaz. Xarici diplomatların Azərbaycanın nəzarətində olan ərazilərə səfəri həmin ərazilərlə bağlı mövcud siyasi reallığın praktik şəkildə nəzərə alındığını göstərən diplomatik mesajdır. Bununla belə, bu səfərləri ayrı-ayrı dövlətlərin Azərbaycanın bütün siyasi mövqelərini avtomatik şəkildə dəstəkləməsi kimi təqdim etmək düzgün olmaz. Lakin diplomatik təmasların coğrafiyasının genişlənməsi özü mühüm siyasi göstəricidir.
Hikmət Hacıyevin səfəri isə bu prosesin digər tərəfini tamamlayır. Xarici diplomatların Xankəndiyə səfərləri Azərbaycanın ərazi üzərində suverenliyinin beynəlxalq praktikada görünən tərəfidirsə, Prezident Administrasiyasının yüksək vəzifəli nümayəndəsinin burada iştirakı həmin suverenliyin dövlət idarəçiliyi və xarici siyasət müstəvisində nümayişidir.
Politoloq hesab edir ki, hazırkı mərhələdə əsas diqqət Xankəndiyə kimin səfər etməsindən daha çox, bu səfərlərin hansı siyasi reallığı formalaşdırdığına yönəlməlidir. Azərbaycanın Qarabağla bağlı gündəliyi tədricən münaqişə və status müzakirələrindən dövlətçilik, inkişaf və reinteqrasiya müstəvisinə keçir. Diplomatik nümayəndələrin səfərləri də bu dəyişimin beynəlxalq müstəvidə görünən nümunələrindən biridir.
Bu baxımdan Hikmət Hacıyevin Xankəndiyə səfərini Azərbaycanın dövlətçilik reallığı ilə xarici siyasət gündəliyinin eyni məkanda birləşməsi kimi qiymətləndirmək mümkündür. Əsas məqam ondan ibarətdir ki, Qarabağ artıq beynəlxalq vasitəçilik və status müzakirələrinin predmeti kimi deyil, Azərbaycanın suveren inkişaf və dövlət idarəçiliyi gündəliyinin tərkib hissəsi kimi təqdim olunur. Xankəndiyə diplomatik səfərlərin intensivləşməsi isə bu yeni reallığın beynəlxalq münasibətlər sistemində getdikcə daha çox görünürlük qazandığını nümayiş etdirir”.