Sentyabrın 10-da Yeni Azərbaycan Partiyası (YAP) Şahbuz rayon təşkilatının XII konfransı keçirilib.Əvvəlcə xalqımızın Ümummilli Lideri Heydər Əliyevin abidəsi ziyarət edilib, önünə gül dəstələri düzülüb.
Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.
YAP Şahbuz rayon təşkilatının sədri Nicat Ələkbərov hesabat məruzəsində təşkilatın strukturunun möhkəmləndirilməsi, ərazi partiya təşkilatlarının fəaliyyətinin tənzimlənməsi və partiya sıralarının kəmiyyət və keyfiyyətcə genişlənməsi istiqamətində görülən işlərdən ətraflı bəhs edib. O, rayon fəallarının ictimai maarifləndirmə layihələrində, sosial təşəbbüslərdə və vətənpərvərlik tədbirlərində yaxından iştirak etdiyini diqqətə çatdırıb. Nicat Ələkbərov, həmçinin Vətən müharibəsi şəhidlərinin ailələrinə və qazilərə diqqət və qayğı göstərilməsini prioritet vəzifə kimi saxladıqlarını və bu istiqamətdə müntəzəm sosial aksiyaların keçirildiyini vurğulayıb.
Konfransda Şahbuz Rayon İcra Hakimiyyətinin başçısı Rəfael Babayev çıxış edərək son illərdə rayonda həyata keçirilən sosial-iqtisadi layihələrdən, kənd yollarının və infrastrukturun modernləşdirilməsindən, əhalinin məşğulluğunun artırılması istiqamətində atılan addımlardan danışıb. R.Babayev vurğulayıb ki, icra hakimiyyəti ilə Yeni Azərbaycan Partiyasının Şahbuz rayon təşkilatı arasında qurulan sıx əməkdaşlıq rayonun sosial-mədəni həyatındakı uğurların əsasını təşkil edir və qarşıda duran strateji vəzifələrin vaxtında icra olunmasına böyük töhfə verir.
Tədbirdə YAP Şahbuz rayon təşkilatının Veteranlar Şurasının üzvü Məhərrəm İsmayılov çıxış edərək Yeni Azərbaycan Partiyasının keçdiyi şərəfli tarixi yoldan və Ulu Öndər Heydər Əliyevin dövlətçilik irsinin əhəmiyyətindən söz açıb. M.İsmayılov xüsusilə vurğulayıb ki, partiya rəhbərliyi tərəfindən uzun illər dövlətçilik ideyalarına xidmət etmiş veteranlara hər zaman böyük diqqət və ehtiramla yanaşılır. O, veteranların zəngin təcrübəsinin gənc nəslin vətənpərvərlik ruhunda tərbiyə olunmasında mühüm rol oynadığını bildirərək, göstərilən bu yüksək qayğıya görə minnətdarlığını ifadə edib.
Daha sonra Naxçıvan Muxtar Respublikası Ali Məclisinin deputatı, şəhid anası Gülşad Rüstəmova çıxış edərək Yeni Azərbaycan Partiyasının ölkənin ictimai-siyasi həyatındakı mühüm rolundan, partiyanın xalqla sıx əlaqəsindən və dövlətçilik ideyalarına sədaqətindən danışıb. O, YAP-ın Ulu Öndər Heydər Əliyevin siyasi irsinin layiqli davamçısı kimi ölkəmizin inkişafına mühüm töhfələr verdiyini vurğulayıb. Şəhidlərin keçdiyi şərəfli döyüş yolundan söz açan G.Rüstəmova onların Vətən qarşısındakı misilsiz xidmətlərinin heç vaxt unudulmayacağını bildirib. Şəhid ailələrinə və qazilərə göstərilən dövlət qayğısını yüksək qiymətləndirən deputat bu istiqamətdə YAP üzvlərinin və rayon təşkilatının fəaliyyətinin də təqdirəlayiq olduğunu qeyd edib.
Təşkilatın gənc üzvü Elvin Səfərov çıxış edərək Ümummilli Lider Heydər Əliyevin əsaslandırdığı və Prezident İlham Əliyev tərəfindən uğurla davam etdirilən dövlət gənclər siyasətindən bəhs edib. O vurğulayıb ki, ölkəmizdə gənclərin hərtərəfli inkişafı, keyfiyyətli təhsil alması, öz bilik və bacarıqlarını realizə etməsi, eləcə də onların idarəetmədə və ictimai-siyasi proseslərdə ön mövqelərə çəkilməsi üçün geniş imkanlar yaradılıb. E.Səfərov dövlətin gənclərə göstərdiyi bu böyük diqqət və qayğıya cavab olaraq Şahbuz gənclərinin də YAP bayrağı altında sıx birləşdiyini və dövlətçilik ideyalarına sədaqətlə xidmət edəcəklərini bildirib.
Milli Məclisin Regional məsələlər komitəsinin sədri Siyavuş Novruzov çıxışında ölkədə həyata keçirilən regional siyasətin uğurlarından, regionların sosial-iqtisadi tərəqqisindən və bu çərçivədə Yeni Azərbaycan Partiyasının üzərinə düşən mühüm vəzifələrdən bəhs edib. S.Novruzov bildirib ki, Prezident İlham Əliyevin rəhbərliyi ilə həyata keçirilən strateji kurs ölkənin hər bir bölgəsində olduğu kimi Şahbuz rayonunda da davamlı inkişafı təmin edib. O, həmçinin qanunvericilik sahəsində görülən işləri diqqətə çatdıraraq, partiya fəallarının ictimai proseslərdə daha təşəbbüskar olmalarının vacibliyini vurğulayıb.
Daha sonra YAP Mərkəzi Aparatının Siyasi təhlil, maarifləndirmə və seçkilərlə iş şöbəsi müdirinin müavini Asif İmaməliyev çıxış edərək ideoloji-siyasi işin müasir tələblər səviyyəsində qurulması, rəqəmsal platformalarda partiya fəaliyyətinin gücləndirilməsi və seçki proseslərinə hazırlıq məsələlərinə toxunub. A.İmaməliyev Mərkəzi Aparatın ideoloji prioritetləri müəyyənləşdirməkdə aparıcı rolunu qeyd edərək, YAP-ın siyasi sistemdəki lider mövqeyini qoruyub saxlamasının əsas səbəbinin xalqın etimadı və təşkilati intizam olduğunu bildirib və yerli təşkilatların informasiya cəbhəsində daha fəal olmasının əhəmiyyətini diqqətə çatdırıb. Çıxışının davamında gənclərin siyasi proseslərdəki roluna toxunan A.İmaməliyev onların partiyanın hərəkətverici qüvvəsi olduğunu, rəqəmsal platformalarda ideoloji işin aparılmasında və qarşıdan gələn seçkilərdə gənclərin fəallığının xüsusi əhəmiyyət kəsb etdiyini vurğulayıb.
Konfransda YAP Şahbuz rayon təşkilatının hesabat dövrü ərzindəki fəaliyyəti qənaətbəxş qiymətləndirilib və Yeni Azərbaycan Partiyasının VIII Qurultayına nümayəndələr seçilib.
Konfrans Yeni Azərbaycan Partiyasının himninin səsləndirilməsi ilə başa çatıb.