...Somali piratları Yəmən sahillərində SIBU 1 neft tankerini ələ keçiriblər. Gəmi Eritreya bayrağı altında üzür, lakin The New York Times qəzeti onun İranın "kölgə donanmasının" bir hissəsi ola biləcəyini aydınlaşdırır.
SİA xəbər verir ki, TankerTrackers.com saytına görə, tanker müntəzəm olaraq İranın dəstəklədiyi Husi üsyançıları tərəfindən idarə olunan Yəməndəki Ras İsa limanına yanacaq çatdırır.
SIBU 1, Somali piratları tərəfindən dörd gün ərzində ələ keçirilən ikinci gəmidir. Yerli hakimiyyət orqanlarının məlumatına görə, silahlı şəxslər Yəmən sahillərindən təxminən 130 mil məsafədə tankerin nəzarətini ələ keçirərək onu Somaliyə aparıblar.
Gəmidə 20 heyət üzvü var; onların taleyi hələ də məlum deyil.
The New York Times qəzeti bölgədə piratçılığın yeni bir artımı barədə məlumat verir.
İlin ilk beş ayında Somali sularında və Ədən körfəzində piratçılıqla əlaqəli 17-dən çox hadisə qeydə alınıb.
Buraya ən azı üç ticarət gəmisinin ələ keçirilməsi daxildir.
Əli Babayev