Birləşmiş Millətlər Təşkilatı (BMT) xəbərdarlıq edib ki, Yəmən 2022-ci ildə əldə olunan atəşkəsdən sonra ilk dəfə yenidən genişmiqyaslı müharibəyə qayıtmaq təhlükəsi ilə üzləşib. Son günlər cəbhə xətlərində döyüşlərin şiddətlənməsi nəticəsində həm hərbçilər, həm də mülki şəxslər arasında itkilər qeydə alınıb.
SİA-nın xarici mətbuata istinadən verdiyi xəbərə görə, BMT-nin Yəmən üzrə xüsusi nümayəndəsi Hans Qrundberq bildirib ki, hazırkı vəziyyət 2022-ci ilin aprelində əldə olunmuş atəşkəsdən bəri ən təhlükəli mərhələdir. Onun sözlərinə görə, tərəflər hərbi eskalasiyanı dayandırmalı və BMT-nin vasitəçiliyi ilə danışıqlara qayıtmalıdırlar.
Məlumata görə, husi qüvvələri ilə beynəlxalq səviyyədə tanınan Yəmən hökuməti arasında xüsusilə Marib, Hadramaut və Moha istiqamətlərində toqquşmalar intensivləşib. Eyni zamanda, Qırmızı dəniz və Ədən körfəzində ticarət gəmilərinə qarşı hücumların artması regional gərginliyi daha da yüksəldib.
BMT rəsmiləri humanitar vəziyyətin də ağırlaşdığını vurğulayıblar. Bildirilib ki, Yəmən əhalisinin yarıdan çoxu kəskin ərzaq çatışmazlığı ilə üzləşib, təxminən 6 milyon insan isə aclıq təhlükəsi altındadır. Bundan başqa, husilər tərəfindən onlarla BMT əməkdaşı və humanitar təşkilat nümayəndəsinin saxlanıldığı qeyd olunub.
BMT bütün tərəfləri təmkinli olmağa çağıraraq bildirib ki, siyasi həll yolu hələ də mümkündür. Lakin hərbi əməliyyatların genişlənməsi sülh prosesini tamamilə iflic edə və Yəməni yenidən uzunmüddətli müharibəyə sürükləyə bilər.