Onun sözlərinə görə, bu vəziyyət Rusiyaya hava zərbələrinin intensivliyini artırmaq və Ukraynanın müdafiə imkanlarını tədricən zəiflətmək imkanı yaradır:“Ukraynanın hava hücumundan müdafiə raketləri ilə bağlı yaşadığı ciddi çatışmazlıq müharibənin yeni mərhələyə keçdiyini göstərir. Əgər müharibənin ilk illərində əsas problem ağır silah və texnika çatışmazlığı idisə, indi əsas məsələ həmin sistemləri işlək saxlayacaq raket ehtiyatlarının azalmasıdır”. Bu sözləri SİA-ya açıqlamasında politoloq Tural İsmayılov deyib.
Onun sözlərinə görə, bu vəziyyət Rusiyaya hava zərbələrinin intensivliyini artırmaq və Ukraynanın müdafiə imkanlarını tədricən zəiflətmək imkanı yaradır:
“Müharibənin gedişi göstərir ki, müasir qarşıdurmalarda üstünlük təkcə döyüş meydanında əldə edilmir. Hərbi sənayenin istehsal gücü, sursat ehtiyatları və fasiləsiz logistika ən az cəbhədəki əməliyyatlar qədər vacibdir. Rusiya raket və pilotsuz uçuş aparatlarından kombinə edilmiş şəkildə istifadə etməklə Ukraynanın hava müdafiə sistemlərini maksimum yükləməyə çalışır. Nəticədə Ukrayna mövcud raket ehtiyatlarından daha qənaətlə istifadə etməyə məcbur qalır.
Digər tərəfdən, Qərb ölkələrinin eyni vaxtda müxtəlif regional böhranlarla üzləşməsi Ukraynaya hərbi yardımın əvvəlki templə davam etdirilməsini çətinləşdirir. Bu isə göstərir ki, uzunmüddətli müharibələrdə resursların davamlı təminatı həlledici faktora çevrilir.
Yaxın perspektivdə cəbhədəki vəziyyətə təsir edəcək əsas amillərdən biri Ukraynanın hava hücumundan müdafiə imkanlarının nə dərəcədə gücləndiriləcəyi olacaq. Əks halda, Rusiyanın hava üstünlüyünü artırmaq cəhdləri həm hərbi, həm də mülki infrastruktur üçün daha ciddi risklər yarada bilər”.