Uzun illər siqaret çəkən hər kəsin xərçəngə tutulmadığı uzun müddətdir elm adamlarını düşündürən suallardan biridir. Yeni elmi araşdırma göstərir ki, bunun əsas səbəbi bəzi insanların DNT-sinin zərərli mutasiyalara qarşı daha güclü müdafiə mexanizminə malik olmasıdır.
SİA-nın xarici mətbuata istinadən verdiyi xəbərə görə, ABŞ-də aparılan tədqiqat çərçivəsində müxtəlif yaş qruplarından olan siqaret çəkən insanların ağciyər hüceyrələri analiz edilib. Məlum olub ki, siqaret tüstüsü hər kəsdə DNT zədələnməsinə səbəb olsa da, bəzi insanların orqanizmi bu zədələri daha effektiv şəkildə bərpa edə bilir. Nəticədə həmin şəxslərdə xərçəngə səbəb olan mutasiyalar daha az toplanır.
Araşdırma müəllifləri bildirirlər ki, bu xüsusiyyət insanı tam qoruyan "qalxan" deyil. Güclü DNT təmir mexanizmi riski azalda bilər, lakin siqaret çəkməyin təhlükəsini aradan qaldırmır. Siqaret təkcə ağciyər xərçəngi deyil, ürək-damar xəstəlikləri, insult, xroniki ağciyər xəstəlikləri və bir çox digər sağlamlıq problemlərinin də əsas risk amillərindən biridir.
Mütəxəssislər vurğulayırlar ki, "filankəs ömrü boyu siqaret çəkib, amma xərçəng olmayıb" fikri elmi əsas sayıla bilməz. Hər bir insanın genetik xüsusiyyətləri fərqlidir və siqaretin orqanizmə təsiri də fərqli ola bilər. Buna görə də siqaret çəkməmək və ya onu tərgitmək sağlamlığın qorunması üçün ən düzgün seçim hesab olunur.