"Azərbaycan Prezidentinin Almaniyaya son rəsmi səfəri həm ikitərəfli münasibətlər baxımından, həm də ölkəmizin Avropa məkanındakı artan geosiyasi rolunun nümayişi baxımından mühüm səfər oldu. Səfər çərçivəsində Almaniyanın ali rəhbərliyi ilə keçirilən görüşlər, imzalanan sənədlər və müzakirə olunan məsələlər göstərir ki, Bakı–Berlin münasibətləri artıq ənənəvi iqtisadi əməkdaşlıq çərçivəsindən çıxaraq strateji tərəfdaşlıq istiqamətində inkişaf edir".
Bunu SİA-ya açıqlamasında politoloq Rəşad Bayramov deyib.
Onun sözlərinə görə, Azərbaycan üçün Almaniya Avropanın aparıcı siyasi və iqtisadi güclərindən biri olmaqla yanaşı, Avropa İttifaqı daxilində mühüm qərarverici aktorlardan biridir:
"Bu baxımdan Berlinlə yüksək səviyyəli siyasi dialoqun gücləndirilməsi Azərbaycanın Avropa istiqamətində diplomatik mövqeyinin möhkəmləndirilməsi baxımından xüsusi əhəmiyyət daşıyır. Səfər zamanı Azərbaycan və Almaniya arasında strateji gündəliyə dair Birgə Bəyannamənin imzalanması isə münasibətlərin daha sistemli mərhələyə keçməsi üçün siyasi çərçivə formalaşdıran addım kimi qiymətləndirilə bilər.
Məlumdur ki, səfərin əsas istiqamətlərindən biri enerji təhlükəsizliyi məsələsi oldu. Son illərdə Avropanın enerji mənbələrini şaxələndirmək siyasəti fonunda Azərbaycanın rolu əhəmiyyətli dərəcədə artıb. Bakı Avropaya təbii qaz ixrac edən etibarlı tərəfdaşlardan biri kimi çıxış edir və bu əməkdaşlıq xüsusilə enerji bazarlarında qeyri-müəyyənliyin artdığı bir dövrdə strateji əhəmiyyət daşıyır. Almaniya ilə enerji sahəsində dialoqun genişlənməsi Azərbaycanın Avropanın enerji təhlükəsizliyində mühüm iştirakçı kimi qəbul edildiyini göstərir.
Digər mühüm istiqamət nəqliyyat və logistika sahəsidir. Rusiya–Ukrayna müharibəsi və qlobal ticarət marşrutlarında baş verən dəyişikliklər fonunda Orta Dəhlizin əhəmiyyəti artır. Azərbaycan bu marşrutun əsas həlqələrindən biri kimi Avropa ilə Mərkəzi Asiya arasında bağlantı imkanlarını genişləndirir. Almaniya kimi iqtisadi gücə malik dövlətin bu proseslərə maraq göstərməsi Azərbaycanın tranzit imkanlarının beynəlxalq səviyyədə daha çox tanınmasına şərait yaradır.
Səfərin siyasi aspektlərindən biri də regional təhlükəsizlik və Cənubi Qafqazdakı proseslərlə bağlıdır. Avropa ölkələri üçün Cənubi Qafqazda sabitlik enerji və nəqliyyat layihələrinin davamlılığı baxımından vacibdir. Azərbaycan–Ermənistan münasibətlərində sülh gündəliyinin irəliləməsi də Almaniya tərəfindən diqqətlə izlənilən məsələlərdəndir. Almaniya rəsmiləri görüşlər zamanı regionda davamlı sülhün vacibliyini vurğulayıblar.
Bununla yanaşı, səfəri yalnız iqtisadi və enerji maraqları ilə məhdudlaşdırmaq düzgün olmazdı. Bu, Azərbaycanın dəyişən beynəlxalq sistemdə öz mövqeyini möhkəmləndirmək, Avropa ilə siyasi dialoqu genişləndirmək və milli maraqlarını daha geniş platformalarda ifadə etmək imkanlarından biridir.
Ümumiyyətlə isə Prezidentin Almaniya səfəri Azərbaycanın Avropa istiqamətində xarici siyasətinin mühüm elementlərindən biri kimi qiymətləndirilə bilər. Bu səfər enerji təhlükəsizliyi, logistika, investisiya, siyasi əməkdaşlıq və regional sabitlik məsələlərində yeni imkanlar açır. Qarşıdakı dövrdə əsas məsələ əldə olunan siyasi razılaşmaların konkret iqtisadi və diplomatik layihələrə çevrilməsi olacaq. Bu baxımdan Berlinlə münasibətlərin inkişafı Azərbaycanın beynəlxalq mövqeyinin möhkəmlənməsinə xidmət edən mühüm amillərdən biri hesab edilə bilər".