Onun sözlərinə görə, Azərbaycan isə müstəqil dövlət kimi bütün qərarlarını milli maraqlar əsasında qəbul edərək ideoloji bloklaşmadan uzaq duran, praqmatik, çevik və çoxşaxəli diplomatiya modeli formalaşdırıb:“Prezident İlham Əliyevin “Həm Qərb, həm də Şərq istiqamətində qonşularımızla əlaqələrimiz əladır” fikri Azərbaycanın xarici siyasət kursunun əsas fəlsəfəsini aydın şəkildə ifadə edir. Müasir geosiyasi qarşıdurmaların, iqtisadi rəqabətin və təhlükəsizlik çağırışlarının getdikcə dərinləşdiyi bir dövrdə müxtəlif siyasi və iqtisadi mərkəzlərlə eyni vaxtda etibarlı münasibətlər qurmaq hər dövlətin nail ola bildiyi strategiya deyil”.
Bu sözləri SİA -ya açıqlamasında politoloq Tural İsmayılov bildirib.
Onun sözlərinə görə, Azərbaycan isə müstəqil dövlət kimi bütün qərarlarını milli maraqlar əsasında qəbul edərək ideoloji bloklaşmadan uzaq duran, praqmatik, çevik və çoxşaxəli diplomatiya modeli formalaşdırıb:
“Bu siyasətin əsas xüsusiyyəti qarşılıqlı hörmət, bərabərhüquqlu əməkdaşlıq və daxili işlərə qarışmamaq prinsiplərinə söykənməsidir. Azərbaycan istər Avropa ölkələri, istər Asiya dövlətləri, istərsə də regionun əsas siyasi və iqtisadi aktorları ilə münasibətlərini qarşılıqlı fayda prinsipi üzərində inkişaf etdirir. Bu yanaşma ölkənin beynəlxalq aləmdə etibarlı tərəfdaş kimi qəbul olunmasına, siyasi dialoqun və iqtisadi əməkdaşlığın genişlənməsinə mühüm töhfə verir.
Azərbaycanın həm Qərb institutları ilə enerji təhlükəsizliyi, nəqliyyat, yaşıl enerji və iqtisadi əməkdaşlıq istiqamətində əlaqələri inkişaf etdirməsi, eyni zamanda Şərq ölkələri ilə ticarət, logistika, investisiya və strateji tərəfdaşlıq münasibətlərini gücləndirməsi balanslaşdırılmış xarici siyasətin real nəticələridir. Bu yanaşma ölkəyə müxtəlif istiqamətlərdən investisiya cəlb etməyə, yeni bazarlara çıxış imkanlarını genişləndirməyə və beynəlxalq layihələrdə fəal iştirak etməyə şərait yaradır.
Azərbaycanın yerləşdiyi geostrateji mövqe də bu siyasətin əhəmiyyətini daha da artırır. Şərqlə Qərbi, Şimalla Cənubu birləşdirən mühüm nəqliyyat və logistika marşrutlarının üzərində yerləşən ölkəmiz beynəlxalq yükdaşımalarında və enerji təchizatında etibarlı tərəfdaş kimi çıxış edir. Orta Dəhlizin inkişafı, nəqliyyat-kommunikasiya layihələrinin genişləndirilməsi və regional iqtisadi inteqrasiyanın təşviqi Azərbaycanın beynəlxalq nüfuzunu daha da möhkəmləndirir.
Balanslaşdırılmış xarici siyasət eyni zamanda Azərbaycanın regional sabitliyin qorunmasına verdiyi töhfədə də özünü göstərir. Ölkə müxtəlif platformalarda dialoqu, əməkdaşlığı və qarşılıqlı etimadı təşviq edən təşəbbüslərlə çıxış edir, beynəlxalq problemlərin həllində konstruktiv mövqe nümayiş etdirir. Məhz buna görə Azərbaycan bir çox mühüm beynəlxalq tədbirlərə ev sahibliyi edir və müxtəlif dövlətlər arasında dialoq üçün etibarlı məkan kimi qəbul olunur.
IV Şuşa Qlobal Media Forumunda səslənən bu mesaj da təsadüfi deyil. Forum artıq beynəlxalq media nümayəndələrinin, ekspertlərin və siyasi analitiklərin bir araya gəldiyi nüfuzlu platformaya çevrilib. Burada səsləndirilən fikirlər yalnız regional deyil, qlobal proseslər baxımından da diqqətlə izlənilir. Prezident İlham Əliyevin çıxışı Azərbaycanın müstəqil xarici siyasət kursunun dəyişməz prinsiplərini bir daha beynəlxalq ictimaiyyətin diqqətinə çatdırdı.
Bu bəyanat həm də dünyaya verilən aydın siyasi mesajdır ki, Azərbaycan hansısa geosiyasi düşərgənin deyil, öz milli maraqlarının tərəfdarıdır. Ölkə beynəlxalq münasibətlər sistemində qarşıdurmanın deyil, əməkdaşlığın, rəqabətin deyil, qarşılıqlı faydalı tərəfdaşlığın tərəfdarı kimi çıxış edir. Azərbaycanın xarici siyasətində əsas meyar milli təhlükəsizliyin təmin olunması, iqtisadi inkişafın davamlılığı və dövlət müstəqilliyinin möhkəmləndirilməsidir.
Bugünkü mürəkkəb beynəlxalq münasibətlər sistemində belə həssas balansı qorumaq güclü siyasi iradənin, müstəqil qərarvermə qabiliyyətinin, strateji uzaqgörənliyin və çevik diplomatiyanın göstəricisidir. Son illər Azərbaycanın beynəlxalq nüfuzunun artması, müxtəlif qlobal təşəbbüslərdə fəal iştirak etməsi və etibarlı tərəfdaş kimi qəbul olunması məhz bu siyasətin uğurla həyata keçirildiyini göstərir. Prezident İlham Əliyevin ifadə etdiyi bu yanaşma Azərbaycanın gələcək xarici siyasət kursunun da əsas istiqamətlərindən biri olaraq ölkənin beynəlxalq mövqeyinin daha da möhkəmlənməsinə xidmət edəcək”.