...Fiat, Abarth brendi altında Topolino kompakt elektrik avtomobilinin idman versiyasını buraxmağı düşünür. Modelinin təvazökar xüsusiyyətlərinə baxmayaraq, şirkət rəhbərliyi belə bir avtomobilin gənclər arasında əsl hit ola biləcəyinə əmindir.
SİA-nın əldə etdiyi məlumata görə, bu barədə Motor1 yazır.
…Fiat-ın baş direktoru Olivye Fransua potensial yeni model haqqında danışıb.
Onun sözlərinə görə, layihə artıq hazırlanır və onun buraxılışı tamamilə mümkündür. Əsas məqsəd Topolino-nu gənc alıcılar üçün daha cəlbedici etməkdir.
Hazırda Topolino, 8 at gücündə mühərrikə, saatda 30 km maksimal sürətə və təxminən 74 km məsafəyə malik ultra kompakt şəhər elektrik avtomobilidir.
Modelin qiyməti təxminən 15.000 dollardır və bu, onu bazarda ən əlverişli yeni avtomobilə çevirir.
Avropada Topolino yüngül kvadrosikl kimi təsnif edilir və bəzi ölkələrdə 14 yaşından etibarən sürmək qanunidir.
Buna görə də Fiat idman versiyası ilə yeniyetmələri cəlb etməyə ümid edir.
Fiat və Abarth şirkətlərinin Avropa bölməsinin rəhbəri Qaetano Torellanın sözlərinə görə, hazırkı Topolino artıq İtaliyada kvadrisikllər arasında satış lideridir, lakin hələlik 16-17 yaşlı alıcıların qəlbini fəth etməyib.
Nazlı Almuradova