...NATO-nun baş katibi Mark Rutte ABŞ prezidenti Donald Trampın Avropa müttəfiqlərinin müdafiə xərclərini artırmasını və silahlı qüvvələrini modernləşdirməsini tələb etməkdə haqlı olduğunu bildirib.
SİA-nın əldə etdiyi məlumata görə, o, bu açıqlamanı Ankarada keçirilən NATO sammiti zamanı Politico-ya verdiyi müsahibədə bəyan edib.
Ruttenin sözlərinə görə, Tramp Duayt Eyzenhauerdən bəri Amerika prezidentlərinin səy göstərdiyi şeyə - ABŞ və Avropa müttəfiqləri arasında müdafiə xərclərinin daha ədalətli bölüşdürülməsinə nail olub.
...Mən bu adamı bəyənirəm. Onun NATO üçün etdiyi işlər əla xəbərdir.
Bunu bildirən Rutte, həmçinin ABŞ-ın İrana qarşı hərbi əməliyyatını dəstəkləyərək, Avropa ölkələrinin bu əməliyyatda əhəmiyyətli rol oynadığını bildirib.
O, Vaşinqtonun Avropadan qüvvələrin proyeksiyası üçün əsas platforma kimi istifadə etdiyini, minlərlə Amerika təyyarəsinin Avropa aerodromlarından havaya qalxdığını bildirib.
NATO rəhbəri müttəfiqlərin yalnız ABŞ tələblərinə görə deyil, həm də Rusiyadan gələn təhdidlər qarşısında öz silahlı qüvvələrini gücləndirməli olduqlarını vurğulayıb.
O, Ukraynadakı hərbi əməliyyatlara, eləcə də Rusiya, Çin, Şimali Koreya və İran arasındakı əməkdaşlığa işarə edib. NATO-nun məlumatına görə, son iki ildə ABŞ istisna olmaqla, 31 ittifaq ölkəsi təxminən 250 milyard dollar dəyərində yeni müdafiə proqramları və investisiyalar elan edib. Ankara sammitində yeni razılaşmaların əldə edilməsi gözlənilir ki, bu da Ruttenin sözlərinə görə, hazırkı görüşü ittifaq üçün "transformativ" edəcək.
Vaşinqtonla bir neçə Avropa paytaxtı arasında fikir ayrılıqlarına baxmayaraq, Rutte NATO-nun vahid qaldığını və Avropanın qitənin təhlükəsizliyi üçün artan məsuliyyət payını öz üzərinə götürdüyünü bildirib.
Əli Babayev