Onun sözlərinə görə, xüsusilə təhqir, böhtan, kibercinayətkarlıq, saxta məlumatların yayılması, dələduzluq və digər qanunazidd halların qarşısının alınması baxımından bu yanaşmanın müəyyən üstünlükləri olduğu qeyd edilir:“Dünyanın bir sıra ölkələrində sosial şəbəkələrə qeydiyyat və ya giriş şəxsiyyəti təsdiq edən sənəd vasitəsilə həyata keçirilir. Bu modelin tətbiq edilməsində əsas məqsəd internet məkanında anonimliyin yaratdığı riskləri minimuma endirmək, istifadəçilərin kimliyini müəyyənləşdirmək və onların hüquqi məsuliyyətini artırmaqdır”.
Bu sözləri SİA-ya açıqlamasında hüquqşünas Ramil Süleymanov bildirib
Onun sözlərinə görə, xüsusilə təhqir, böhtan, kibercinayətkarlıq, saxta məlumatların yayılması, dələduzluq və digər qanunazidd halların qarşısının alınması baxımından bu yanaşmanın müəyyən üstünlükləri olduğu qeyd edilir:
“Şəxsiyyətin təsdiqlənməsi eyni zamanda sosial şəbəkələrdə saxta hesabların sayının azalmasına, istifadəçilərin öz davranışlarına daha məsuliyyətlə yanaşmasına və rəqəmsal platformalarda daha təhlükəsiz mühitin formalaşmasına xidmət edə bilər. Bundan başqa, vətəndaşın adına onun xəbəri olmadan hesab açılması, həmin hesabdan qanunsuz fəaliyyət üçün istifadə edilməsi və ya şəxsi məlumatlarının sui-istifadəyə məruz qalması kimi halların qarşısının alınmasında da bu mexanizm müəyyən rol oynaya bilər.
Digər tərəfdən, bir çox ölkələrdə belə bir sistemin tətbiqi ifadə azadlığı, şəxsi həyatın toxunulmazlığı və məlumatların məxfiliyinin qorunması baxımından ciddi müzakirələrə səbəb olur. Hüquq müdafiəçiləri hesab edirlər ki, sosial şəbəkələrdən istifadə üçün şəxsiyyətin məcburi qaydada təsdiqlənməsi insanların sərbəst fikir ifadə etmək imkanlarını məhdudlaşdıra, onları öz mövqelərini açıq şəkildə bildirməkdən çəkindirə və nəticədə ictimai müzakirələrin azad xarakterinə mənfi təsir göstərə bilər.
Bundan əlavə, milyonlarla istifadəçinin şəxsi məlumatlarının mərkəzləşdirilmiş qaydada toplanması və saxlanılması kibertəhlükəsizlik baxımından da müəyyən risklər yaradır. Məlumat bazalarının sızması və ya üçüncü şəxslərin əlinə keçməsi vətəndaşların şəxsi həyatına müdaxilə, maliyyə dələduzluğu və şəxsiyyət oğurluğu kimi ciddi problemlərə yol aça bilər. Buna görə də belə sistemlərin tətbiqi zamanı məlumatların qorunması, şəffaflıq, hüquqi nəzarət və müstəqil audit mexanizmlərinin mövcudluğu xüsusi əhəmiyyət daşıyır.
Sosial şəbəkələrdə şəxsiyyətin təsdiqlənməsi həm üstünlüklərə, həm də müəyyən risklərə malik olan bir mexanizmdir. Bir tərəfdən rəqəmsal təhlükəsizliyin artırılmasına və hüquqpozmaların azalmasına töhfə verə bilər, digər tərəfdən isə şəxsi məlumatların qorunması və ifadə azadlığının təmin olunması ilə bağlı həssas hüquqi məsələləri gündəmə gətirir. Buna görə də bu istiqamətdə qəbul ediləcək qərarlar təhlükəsizliklə fundamental hüquq və azadlıqlar arasında balansın qorunması prinsipi əsasında formalaşdırılmalıdır”.