_(1)_(1).jpg)
"26 iyun Silahlı Qüvvələr Günü Azərbaycan dövlətçiliyinin və milli təhlükəsizlik sisteminin inkişaf tarixində xüsusi yer tutan əlamətdar günlərdən biridir. Bu tarix ordunun yaranması ilə yanaşı, həm də müstəqil Azərbaycanın öz təhlükəsizlik konsepsiyasını formalaşdırmaq və dövlət suverenliyini qorumaq istiqamətində keçdiyi mürəkkəb yolu simvolizə edir".
Bu sözləri SİA-ya açıqlamasında politoloq Yusif Bağırzadə deyib.
Onun sözlərinə görə, Azərbaycan Silahlı Qüvvələrinin əsası 1918-ci ildə Azərbaycan Xalq Cümhuriyyəti dövründə qoyulub:
"Müstəqilliyin bərpasından sonra isə ordu quruculuğu dövlət siyasətinin əsas prioritetlərindən birinə çevrildi. Xüsusilə ümummilli lider Heydər Əliyevin hakimiyyətə qayıdışından sonra bu istiqamətdə sistemli islahatlara başlanıldı, vahid komandanlıq prinsipi möhkəmləndirildi və peşəkar hərbi idarəetmə mexanizmləri formalaşdırıldı.
Sonrakı illərdə Azərbaycanın iqtisadi imkanlarının genişlənməsi ordu quruculuğuna da müsbət təsir göstərdi. Müdafiə büdcəsinin artırılması, müasir silah və texnologiyaların alınması, şəxsi heyətin sosial təminatının yaxşılaşdırılması və beynəlxalq hərbi əməkdaşlığın genişləndirilməsi nəticəsində Silahlı Qüvvələrimiz regionun ən güclü ordularından birinə çevrildi. Bu proses təkcə texniki modernləşmə ilə məhdudlaşmadı, eyni zamanda döyüş hazırlığı, peşəkarlıq və strateji planlaşdırma sahələrində də mühüm nailiyyətlər əldə edildi.
Azərbaycan Ordusunun inkişafında ən mühüm mərhələlərdən biri 2020-ci ildə baş vermiş 44 günlük Vətən müharibəsi oldu. Həmin dövrdə Silahlı Qüvvələr müasir döyüş texnologiyalarından və koordinasiyalı əməliyyat idarəetməsindən istifadə etməklə qarşıya qoyulan vəzifələri yerinə yetirdi. Bu proses həm ordunun hazırlıq səviyyəsini, həm də Prezident İlham Əliyev tərəfindən uzun illər ərzində həyata keçirilən hərbi islahatların nəticələrini nümayiş etdirdi. Sonrakı dövrdə aparılan əməliyyatlar da Azərbaycanın öz suverenliyini və ərazi bütövlüyünü tam şəkildə təmin etmək istiqamətində atdığı addımların tərkib hissəsi oldu.
Bu gün Silahlı Qüvvələr Gününə yalnız hərbi bayram kimi baxmaq düzgün olmazdı. Müasir dünyada orduların rolu təkcə sərhədlərin müdafiəsi ilə məhdudlaşmır. Yeni texnologiyalar, kibertəhlükəsizlik çağırışları, pilotsuz sistemlər və informasiya müharibələri hərbi quruculuğa yeni yanaşmalar tələb edir. Azərbaycan da bu dəyişiklikləri nəzərə alaraq öz müdafiə qabiliyyətini davamlı şəkildə yeniləməyə çalışır.
26 İyun eyni zamanda dövlətlə ordu arasındakı birliyin, cəmiyyətin Silahlı Qüvvələrə olan etimadının və hərbi qulluqçuların xidmətinə verilən dəyərin ifadəsidir. Bu gün Azərbaycan Ordusu ölkəmizin təhlükəsizliyinin təminatçısı olmaqla yanaşı, həm də dövlət müstəqilliyinin, suverenliyin və milli maraqların qorunmasının əsas dayaqlarından biri kimi çıxış edir. Məhz buna görə Silahlı Qüvvələr Günü həm hərbçilər, həm də bütün Azərbaycan cəmiyyəti üçün xüsusi əhəmiyyət daşıyan bir tarixdir".