O bildirib ki, digər səbəb vasitəçilərin çox olmasıdır:
Mövsümi meyvələrin ucuzlaşmamasının bir neçə əsas səbəbi var. Məntiqə görə məhsul bol olduqda qiymətlər aşağı düşməlidir. Lakin son illərdə istehsal və satış xərcləri də ciddi şəkildə artıb. Fermerlər yanacaq, gübrə, pestisid, suvarma, işçi qüvvəsi və nəqliyyat üçün əvvəlkindən daha çox vəsait xərcləyirlər. Bu xərclər son qiymətə əlavə olunur.
Bu sözləri SİA-ya açıqlamasında Liberal İqtisadçılar Mərkəzinin sədri Akif Nəsirli deyib.
O bildirib ki, digər səbəb vasitəçilərin çox olmasıdır:
”Meyvə bağdan istehlakçıya çatana qədər bir neçə alıcı və satıcıdan keçir. Hər mərhələdə əlavə mənfəət qoyulduğu üçün məhsulun qiyməti yüksəlir.
Hava şəraiti də mühüm rol oynayır. Yaz şaxtaları, dolu, quraqlıq və ya güclü yağışlar məhsuldarlığı azaldır. Mövsüm başlasa da, bazara çıxarılan məhsulun həcmi gözləniləndən az olduqda qiymətlər yüksək qalır.
İxrac amili də təsirlidir. Yerli meyvələr xarici bazarlarda daha sərfəli qiymətə satıldıqda məhsulun bir hissəsi ixraca yönəlir. Bu isə daxili bazarda təklifi azaldaraq qiymətlərin aşağı düşməsinə mane olur.
Bundan əlavə, ümumi inflyasiya da öz təsirini göstərir. Ölkədə mal və xidmətlərin qiyməti artdıqca kənd təsərrüfatı məhsulları da bu prosesdən kənarda qalmır.
Nəticədə, mövsümün başlaması təkbaşına qiymətlərin ciddi ucuzlaşacağı anlamına gəlmir. Məhsul bolluğu olsa belə, yüksək istehsal xərcləri, logistika problemləri, ixrac və inflyasiya qiymətlərin əvvəlki illərdəki kimi aşağı düşməsinə imkan verməyə bilər”.
Ayşən Vəli