“Aqarak” gömrük keçid məntəqəsində İrandan daxil olan yük maşınının gömrük yoxlaması nəticəsində gömrük əməkdaşları nəqliyyat vasitəsinin sürücü kabinəsində bəyan edilməmiş təbii saçlar aşkar ediblər.
SİA-nın xarici mətbuata istinadən verdiyi xəbərə görə, Dövlət Gəlirləri Komitəsinin açıqlamasında kabinədəki yastıqların arasından 26 kq ağırlığında 143 ədəd təbii saç dəstəsi tapıldığı bildirilir.
"Təbii saçların qanunsuz idxalına cəhdin qarşısı alınıb və tapılan saçlar müsadirə edilib. Dövlət sərhədinin quru keçid məntəqələrində Gömrük Xidməti və Nəzarət Departamentinin əməkdaşları İran vətəndaşına qarşı "Gömrük Tənzimlənməsi haqqında" Qanunun 316-cı maddəsinə uyğun olaraq gömrük qaydalarının pozulması ilə bağlı protokol tərtib ediblər", - deyə açıqlamada bildirilir.
Hesabatda həmçinin vurğulanır ki, son vaxtlar bu cür hallar artıb. İlin əvvəlindən iyun ayına qədər gömrük nəzarətindən gizlədilən və bəyan edilməmiş 11 təbii saç idxalı aşkar edilib və Ermənistan Respublikasının dövlət sərhədindən ümumilikdə 621 dəstə və ya 135,7 kq təbii saç idxalına cəhd edilib. Dövlət Gəlirləri Komitəsi xarici iqtisadi fəaliyyətlə məşğul olan şəxsləri gömrük qanunvericiliyinin tələblərinə ciddi şəkildə riayət etməyə, sərhəddən keçirilən bütün malları bəyan etməyə və malları gömrük nəzarətindən gizlətməyə və ya bəyan etməməyə cəhdlərdən çəkinməyə çağırır.
Lətifə Abdıyeva