“Reklamın təsiri təqdimatın psixoloji mexanizmlərindən asılı olur” -SOSİOLOQ DANIŞDI

Sosial şəbəkələrdə reklam fəaliyyəti müasir dövrdə istehlakçı davranışına ciddi təsir göstərən əsas kommunikasiya vasitələrindən birinə çevrilib.
Bu sözləri SİA -ya açıqlamasında əməkdar jurnalist, sosioloq Mətanət Məmmədova bildirib.

Onun sözlərinə görə, xüsusilə influencer marketing modeli çərçivəsində məhsul və xidmətlərin təqdimatı yeni informasiya mühitinin formalaşmasına səbəb olub:

”Bu modeldə bloqerlər və influenserlər məhsulları tanıdır, qarşılığında isə maddi və ya barter formasında qazanc əldə edirlər. Nəticədə auditoriya təqdim olunan məzmunu çox vaxt rəsmi reklamdan daha çox şəxsi tövsiyə kimi qəbul edir.

Bununla belə, bu prosesdə müəyyən ziddiyyətlər də müşahidə olunur. Bəzi influenserlər yalnız etibarlı və keyfiyyətli məhsulları təqdim etməyə üstünlük verdiyi halda, digərləri qısamüddətli gəliri əsas götürür. Bu isə informasiya mühitində etibarlılıq və seçim keyfiyyəti ilə bağlı problemlər yaradır. Beləliklə, reklamın “tövsiyə” formatında təqdim olunması istehlakçı qavrayışında reallığın təhrifinə səbəb ola bilər.

Sosial psixologiyada bu hal “sosial sübut effekti” kimi izah edilir. İnsanlar çoxluğun və ya tanınmış şəxslərin seçimlərini daha doğru hesab etməyə meyllidirlər. Buna görə də reklamın təsiri yalnız məhsulun keyfiyyətindən deyil, həm də təqdimatın psixoloji mexanizmlərindən asılı olur.

Digər tərəfdən, internet mühitində reklam fəaliyyətinin hüquqi tənzimlənməsi də aktuallığını qoruyur. Mövcud qanunvericiliyə əsasən reklamın açıq şəkildə qeyd olunması tələb edilsə də, bu qaydalara əməl olunması hər zaman tam təmin edilmir. Bu isə istehlakçıların məlumatlı seçim imkanlarını məhdudlaşdıra bilir.

Rəqəmsal mühitin sürətli inkişafı isə hüquqi nəzarət mexanizmlərinin daim yenilənməsini zəruri edir. Reklam subyektləri, təqdimat formaları və məsuliyyət mexanizmləri daha dəqiq müəyyənləşdirilməli, istehlakçıların aldadılması halları hüquqi çərçivədə qiymətləndirilməlidir.

Sosial şəbəkələrdə reklam fəaliyyəti həm iqtisadi, həm də sosial-psixoloji baxımdan kompleks bir fenomen kimi çıxış edir. Onun effektiv və şəffaf şəkildə tənzimlənməsi istehlakçı hüquqlarının qorunması ilə yanaşı, rəqəmsal informasiya mühitində etibarlılığın təmin olunması baxımından da mühüm əhəmiyyət daşıyır”.