Onun sözlərinə görə, mövcud vəziyyət göstərir ki, cəbhənin əsas istiqamətlərində tərəflərin strateji dönüş yarada biləcək əhəmiyyətli irəliləyiş əldə etməsi getdikcə çətinləşir:“Rusiya–Ukrayna müharibəsi hazırkı mərhələdə faktiki olaraq uzunmüddətli tükəndirmə müharibəsi xarakteri daşıyır. Münaqişənin dinamikası artıq 2022-ci ilin ilk mərhələsində müşahidə olunan genişmiqyaslı manevr əməliyyatlarından fərqli olaraq, daha çox artilleriya üstünlüyü, pilotsuz uçuş aparatları və möhkəmləndirilmiş müdafiə xətləri üzərində formalaşıb”.
Bu sözləri SİA -ya açıqlamasında politoloq Yusif Bağırov bildirib.
Onun sözlərinə görə, mövcud vəziyyət göstərir ki, cəbhənin əsas istiqamətlərində tərəflərin strateji dönüş yarada biləcək əhəmiyyətli irəliləyiş əldə etməsi getdikcə çətinləşir:
” Rusiya müəyyən ərazilərdə mərhələli şəkildə irəliləməyə çalışsa da, bu proses əksər hallarda böyük itkilər və uzunmüddətli döyüşlər hesabına baş verir. Ukrayna isə Qərb ölkələrinin hərbi dəstəyi, xüsusilə hava hücumundan müdafiə sistemləri sayəsində müdafiə mövqelərini qorumağa və Rusiyanın logistika xətlərinə zərbələr endirməyə üstünlük verir.
Müharibənin gedişində diqqət çəkən əsas dəyişikliklərdən biri texnologiyanın rolunun əhəmiyyətli dərəcədə artmasıdır. Pilotsuz uçuş aparatları, elektron müharibə vasitələri və uzaqmənzilli dəqiq zərbə sistemləri klassik cəbhə anlayışını dəyişdirərək, döyüş əməliyyatlarını ön xətdən daha uzaqlara daşıyıb. Nəticədə hərbi infrastruktur, sursat anbarları və logistika mərkəzləri birbaşa hədəfə çevrilib. Bu isə müharibəni yalnız cəbhə xətti ilə məhdudlaşmayan, daha geniş strateji müstəviyə çıxarıb.
Diplomatik müstəvidə isə hələlik ciddi irəliləyiş müşahidə olunmur. Tərəflərin mövqeləri fundamental məsələlərdə bir-birindən kəskin şəkildə fərqlənir. Rusiya təhlükəsizlik zonaları və nəzarətində olan ərazilərin statusu ilə bağlı tələblərini qoruyub saxlayır. Ukrayna isə ərazi bütövlüyünün bərpasını əsas şərt kimi irəli sürür və hər hansı ərazi güzəştini qəbul etməyəcəyini bildirir. Bu ziddiyyətlər yaxın perspektivdə sülh danışıqlarının real nəticə verməsini çətinləşdirən əsas amillərdən biri olaraq qalır.
Eyni zamanda, müharibə Qərb ölkələri daxilində də siyasi və iqtisadi müzakirələri dərinləşdirir. Uzunmüddətli münaqişə Avropa dövlətləri üçün enerji təhlükəsizliyi, müdafiə xərclərinin artırılması və iqtisadi dayanıqlığın qorunması baxımından əlavə çağırışlar yaradır. Bununla yanaşı, Ukraynaya hərbi və maliyyə dəstəyinin davam etdirilməsi məsələsi də Qərb ölkələrinin daxili siyasi gündəmində mühüm yer tutur.
Hazırkı mərhələdə Rusiya–Ukrayna müharibəsinin strateji tükəndirmə mərhələsində olduğunu söyləmək mümkündür. Tərəflərdən heç biri həlledici üstünlük əldə edə bilmir, eyni zamanda müharibənin başa çatması üçün zəruri siyasi kompromis də formalaşmır. Bu vəziyyət göstərir ki, münaqişə yaxın dövrdə də davam edə bilər və proses daha çox resurs, texnologiya və insan itkisi hesabına uzana bilər”.