"Təhsil hər bir insanın həyatında taleyüklü rol oynayan, gələcəyin qapılarını açan ən mühüm amillərdən biridir. Xüsusilə çətin həyat şəraitindən keçmiş, doğma yurdlarından didərgin düşmüş məcburi köçkün ailələrinin övladları üçün təhsil sadəcə bilik əldə etmək deyil, həm də daha güclü və daha inamlı gələcəyə aparan ümid yoludur".
Bu sözləri SİA-ya açıqlamasında Milli Məclisin Mədəniyyət komitəsinin üzvü, deputat Elnarə Akimova deyib.
Elnarə Akimova sözlərinə belə davam edib: “Məhz bu baxımdan 2025/2026-cı tədris ilində ödənişli əsaslarla ali və orta ixtisas təhsil müəssisələrinə yeni qəbul olunmuş 3 923 məcburi köçkün statuslu tələbənin təhsil xərclərinin dövlət tərəfindən qarşılanması son dərəcə mühüm və təqdirəlayiq sosial dəstək addımıdır.
Bu qərar minlərlə ailənin üzərindəki maddi yükü azaltmaqla yanaşı, gənclərə “sizin yanınızdayıq” mesajını verir. İllərlə doğma torpaqlarından uzaqda yaşamaq məcburiyyətində qalan ailələrin övladları üçün ali təhsil almaq bəzən maddi çətinliklər səbəbindən əlçatmaz görünə bilərdi. Dövlət tərəfindən göstərilən bu dəstək isə onların arzularını gerçəkləşdirmək, istedad və bacarıqlarını inkişaf etdirmək üçün yeni imkanlar yaradır.
Ən vacib məqamlardan biri odur ki, təhsil xərclərinin qarşılanması yalnız bu günün problemi ilə bağlı deyil, həm də gələcəyə yönəlmiş strateji investisiyadır. Təhsil alan hər bir gənc gələcəkdə peşəkar mütəxəssis, müəllim, mühəndis, həkim və ya sahibkar kimi cəmiyyətin inkişafına töhfə verəcək. Bu mənada dövlətin bu addımı insan kapitalının gücləndirilməsinə xidmət edir və uzunmüddətli perspektivdə ölkənin sosial-iqtisadi inkişafına müsbət təsir göstərir.
Məcburi köçkün ailələrindən olan gənclərin sosial-iqtisadi inteqrasiyası baxımından da bu qərarın xüsusi əhəmiyyəti var. Təhsil onların əmək bazarında rəqabət qabiliyyətini artırır, layiqli iş imkanları əldə etmələrinə şərait yaradır və sosial rifahlarının yüksəlməsinə zəmin yaradır. Savadlı, peşəkar və vətənpərvər gənclər cəmiyyətin ən böyük sərvətidir. Bu gün onların təhsilinə qoyulan sərmayə sabah ölkənin daha güclü və daha firavan gələcəyinə çevriləcək.
Bu təşəbbüs həm də sosial ədalət prinsipinin təcəssümüdür. Dövlət həssas əhali qruplarına xüsusi diqqət göstərməklə hər bir vətəndaşın bərabər imkanlara malik olması istiqamətində mühüm addımlar atır. Məcburi köçkün gənclərin təhsil hüququnun təmin olunması onların cəmiyyətə daha fəal inteqrasiyasına, öz potensiallarını reallaşdırmalarına və gələcəyə daha böyük inamla baxmalarına şərait yaradır.
Bu gün auditoriyalarda əyləşən həmin minlərlə gəncin gözlərindəki ümid işığı əslində dövlətin həyata keçirdiyi sosial siyasətin ən gözəl nəticələrindən biridir. Çünki təhsil verilən dəstək yalnız bir tələbənin deyil, bütöv bir ailənin, hətta bütöv bir nəslin taleyini dəyişə bilər. Məhz buna görə də 3 923 məcburi köçkün statuslu tələbənin təhsil xərclərinin dövlət tərəfindən qarşılanması sadəcə maliyyə yardımı deyil, gələcəyə, biliyə və insan potensialına verilən yüksək dəyərin bariz nümunəsidir".