Onun sözlərinə görə, İsrail ABŞ üçün Yaxın Şərq regionunda ən vacib və etibarlı müttəfiqlərdən biri hesab olunur:“ABŞ və İsrail münasibətləri strateji əhəmiyyət daşıyır və bu əlaqələr zahirdə göründüyündən daha mürəkkəb və çoxşaxəli xarakterə malikdir. Bu münasibətlər təkcə iki dövlət arasında adi diplomatik əlaqə deyil, həm də uzun illər ərzində formalaşmış siyasi, hərbi, iqtisadi və təhlükəsizlik maraqlarının kəsişdiyi bir sistem kimi qiymətləndirilir”.
Bu sözləri SİA-ya açıqlamasında politoloq Turan Rzayev bildirib.
Onun sözlərinə görə, İsrail ABŞ üçün Yaxın Şərq regionunda ən vacib və etibarlı müttəfiqlərdən biri hesab olunur:
” ABŞ isə İsrailin təhlükəsizliyinin təmin olunmasında, hərbi dəstək və beynəlxalq arenada diplomatik müdafiə baxımından mühüm rol oynayır. Bu qarşılıqlı asılılıq iki ölkə arasında münasibətlərin davamlılığını gücləndirən əsas amillərdən biridir.
Bəzi hallarda ABŞ daxilində müxtəlif lobbi qruplarının, o cümlədən yəhudi təşkilatlarının siyasi proseslərə təsiri barədə müzakirələr aparılır. Eyni zamanda İsrail kəşfiyyat orqanlarının, xüsusilə Mossadın fəaliyyəti də beynəlxalq siyasətdə tez-tez diqqət mərkəzində olur. Lakin bu amillər dövlətlərarası münasibətlərin əsasını deyil, daha çox siyasi analitik müzakirələrin bir hissəsini təşkil edir.
İsrailin ABŞ ilə sıx siyasi, iqtisadi və hərbi əməkdaşlığı mövcuddur və bu əməkdaşlıq hər iki tərəfin strateji maraqlarına xidmət edir. ABŞ-da müxtəlif siyasi dairələr və ictimai təşkilatlar İsrailə dəstək mövqeyi nümayiş etdirir. Buna görə də bu münasibətlərin qısa müddətdə kəskin şəkildə dəyişməsi və ya pozulması real görünmür.
Eyni zamanda, beynəlxalq münasibətlərdə ayrı-ayrı liderlər arasında fikir ayrılıqları və siyasi gərginliklər yarana bilər. Məsələn, müxtəlif dövrlərdə ABŞ və İsrail rəhbərləri arasında bəzi məsələlərdə fərqli yanaşmalar müşahidə olunub. Lakin bu cür fərqliliklər adətən dövlətlərarası strateji əməkdaşlığa ciddi təsir göstərmir, çünki münasibətlər şəxslərdən daha çox institusional maraqlara əsaslanır.
ABŞ–İsrail münasibətləri uzunmüddətli strateji tərəfdaşlıq üzərində qurulub və bu əməkdaşlığın yaxın gələcəkdə əsaslı şəkildə zəifləməsi ehtimalı aşağı qiymətləndirilir. Regional təhlükəsizlik, iqtisadi maraqlar və beynəlxalq siyasətdəki ümumi mövqelər bu əlaqələrin davamlılığını təmin edən əsas faktorlardır”.