"İnsanlar çox vaxt düşünürlər ki, internetdə paylaşdıqları məlumatı sonradan silmək istəsələr, bunu bir düymə ilə etmək mümkündür. Amma reallıq bir qədər fərqlidir. İnternetə yerləşdirilən məlumat bir dəfə yayıldıqdan sonra onun tamamilə yox edilməsi çox çətinləşir".
Bunu SİA-ya açıqlamasında texnoloq Elvin Həsənov deyib.
Onun sözlərinə görə, bunun əsas səbəbi məlumatın eyni anda bir neçə yerdə saxlanılmasıdır: "Məsələn, siz sosial şəbəkədə şəkil paylaşdınız və sonra onu sildiniz. Amma həmin şəkil başqa istifadəçilər tərəfindən yüklənə, ekran görüntüsü çəkilə, müxtəlif serverlərdə ehtiyat nüsxə kimi saxlanıla və ya axtarış sistemləri tərəfindən indeksləşdirilə bilər. Yəni siz məlumatı bir platformadan silsəniz belə, onun başqa nüsxələri internetdə qalmağa davam edə bilər.
Bir başqa maraqlı məqam isə odur ki, insanlar çox vaxt nə qədər məlumat paylaşdıqlarının fərqində olmurlar. Bir şəkil, bir şərh, bir qeydiyyat forması və ya bir tətbiqə verilən icazə zamanla insan haqqında kifayət qədər geniş rəqəmsal profil formalaşdıra bilir. Sonradan həmin məlumatları bir-bir toplamaq və silmək isə olduqca mürəkkəb prosesə çevrilir.
Ona görə də ən vacib qayda məlumatı paylaşmazdan əvvəl düşünməkdir. Şəxsi sənədlər, biometrik məlumatlar, ailə məlumatları, maliyyə məlumatları və digər həssas informasiyalar internetdə paylaşılarkən iki dəfə düşünmək lazımdır".