Bakı Şəhri Mədəniyyət Baş İdarəsi G.Şaroyev adına 35 nömrəli 11 illik musiqi musiqi məktəbində 1 iyun Uşaqların Beynəlxalq Müdafiəsi Gününə həsr olunmuş hesabat konserti keçirilib. Aparıcı Nərmin İsgəndərova çıxış edərək uşaqların insan ömrünün bəzəyi, ailənin səadəti və xalqın sabahı olduğunu xüsusi olaraq qeyd edib.
"Onların sağlam, təhlükəsiz və qayğılı bir mühitdə böyüməsini təmin etmək hər bir dövlətin və cəmiyyətin əsas vəzifələrindən biridir. Uşaqların Beynəlxalq Müdafiəsi Günü ilk dəfə 1925-ci ildə Cenevrədə Uşaqların Rifahı üzrə Ümumdünya Konfransı zamanı elan edilib. 1950-ci il iyunun 1-də BMT Baş Assambleyası tərəfindən Uşaqların Beynəlxalq Müdafiəsi Gününün qeyd olunması qərara alınıb. Dünyanın hər yerində olduğu kimi, bu gün Azərbaycanda da qeyd edilir. Uşaqlar çox həssasdırlar, bu baxımdan onların fiziki, psixi və sosial rifahının təmin edilməsi, onların gələcəyin fərdləri kimi yetişməsi üçün vacibdir. Azərbaycanda da bu gün uşaqların hüquqlarının müdafiəsi, onların sosial təminatı və sağlamlıq imkanları məhdud olan uşaqlara xüsusi qayğı göstərilməsi kimi məsələlər dövlət siyasətinin prioritetləri sırasındadır", deyə aparıcı bildirib.
Qeyd edib ki, ölkəmizdə uşaqların müdafiə olunması və qayğı göstərilməsi istiqamətində çoxsaylı işlər görülüb. Sosial və hüquqi müdafiə ilə bağlı məsələlər Konstitusiya, qanunverici və normativ-hüquqi aktlarla tənzimlənir. Bununla bağlı 1998-ci il 19 may tarixində "Uşaq hüquqları haqqında" qanun qəbul edilib.
Azərbaycan Respublikasının Prezidenti İlham Əliyevin uşaqlara dövlət qayğısının gücləndirilməsi, uşaq problemlərinə vətəndaş cəmiyyəti qurumlarının diqqətinin artırılması və ölkənin uşaqlarla bağlı demoqrafik perspektivlərinin müəyyənləşdirilməsi məqsədilə 22 dekabr 2008-ci il tarixli sərəncam imzalamışdır. Sərəncama görə 2009-cu il "Uşaq ili" elan olunmuşdur.
Bugün ölkəmizdə uşaqların sağlam mühitdə böyüməsi və tərbiyə alması, müvafiq standartlara cavab verən təhsil müəssisələrində oxuması üçün hər cür şərait yaradılmışdır. Bütün uşaqları Uşaqların Beynəlxalq müdafiəsi günü münasibətilə ürəkdən təbrik edir, onlara səadət, şən həyat, xoşbəxt gələcək arzulayırıq.
Tədbirdə Bakı Şəhər Mədəniyyət Baş İdarəsinin rəisi İbrahim Əliyev, İdarənin Musiqi və İncəsənət sektorunun müdiri Altun Rəcəbli, Əməkdar jurnalist Xoşqədəm Baxşəliyeva, Q.Qarayev adına Mərkəzi İncəsənət Məktəbinin direktoru Könül Hüseynova, Bakı Şəhər Mədəniyyət Baş İdarəsinin tabeçiliyində olan musiqi və incəsənət məktəblərinin direktorları və başqa qonaqlar iştirak ediblər.
G.Şaroyev adına 35 nömrəli 11 illik musiqi musiqi məktəbin direktoru Vəfa Həziyeva çıxış edərək tədbir iştirakçılarını salamlayıb, onlara tədbirdə iştirak etdiklərinə görə təşəkkürünü bildirib. Ulu Öndər Heydər Əliyevin hər zaman uşaqlara xüsusi qayğı və diqqətlə yanaşdığını, Prezident İlham Əliyevin uşaqların savadlı, sağlam və firavan böyüməsi, rifahının yüksəldilməsi məsələlərini dövlət siyasətinin başlıca istiqamətlərindən biri kimi qəbul etdiyini qeyd edib.
Bakı Şəhər Mədəniyyət Baş İdarəsinin rəisi İbrahim Əliyev çıxış edərək uşaqları bayram münasibətilə təbrik edib və tədbirdə çıxış edən şagirdlərə uğurlar arzulayıb. Qeyd edib ki, Azərbaycanda uşaqların hüquqlarının qorunması və onların müdafiəsi dövlət siyasətinin əsas istiqamətlərindən biridir. Uşaqlar cəmiyyətin gələcəyi hesab olunurlar və onların sağlam, təhlükəsiz və xoşbəxt böyümələri üçün müxtəlif qanunlar, proqramlar və sosial layihələr həyata keçirilir. Birinci vitse-prezident Mehriban Əliyeva tərəfindən daim uşaqların keyfiyyətli təhsil və yüksək dünya standartlarına cavab verən tibbi xidmətlərlə təmin edilmələri, hərtərəfli qayğı ilə əhatə olunmaları diqqət mərkəzində saxlanılır. Ölkəmizdə uşaqların sağlam və savadlı böyüməsi Heydər Əliyev Fondunun siyasətinin prioritet istiqaməti olduğundan Fond tərəfindən bu istiqamətdə müxtəlif genişmiqyaslı proqramlar həyata keçirilməkdədir.
Tədbirdə digər çıxışlar da dinlənilib.
Tədris ilində fərqlənən müəllimlər "Fəxri Fərman" və "Təşəkkürnamə"lərlə təltif olunublar.
Sonra söz musiqiyə verilib.