Onun sözlərinə görə, xüsusilə Bitcoin və Ethereum kimi aparıcı kriptovalyutalar bazarın istiqamətini müəyyən edən əsas indikatorlar rolunu oynayır:“Kriptovalyuta bazarında son dövrlərdə müşahidə olunan dalğalanmalar davam etsə də, ümumi tendensiya əvvəlki illərlə müqayisədə daha institusional və strukturlaşmış xarakter almışdır”.
Bu sözləri SİA -ya açıqlamasında Liberal İqtisadçılar Mərkəzinin sədri Akif Nəsirli bildirib.
Onun sözlərinə görə, xüsusilə Bitcoin və Ethereum kimi aparıcı kriptovalyutalar bazarın istiqamətini müəyyən edən əsas indikatorlar rolunu oynayır:
”ABŞ-də spot Bitcoin ETF-lərinin təsdiqlənməsi və iri investisiya fondlarının bu sektora daxil olması kriptoaktivlərə olan marağın yenidən artmasına və bazarın legitimlik səviyyəsinin yüksəlməsinə şərait yaratmışdır.
Bununla yanaşı, kripto bazarında spekulyativ davranışların əvvəlki dövrlərlə müqayisədə nisbətən zəiflədiyi müşahidə olunur. İnvestorların diqqəti getdikcə daha çox real tətbiq sahəsinə malik blokçeyn layihələrinə, infrastruktur həllərinə və süni intellekt inteqrasiyalı rəqəmsal platformalara yönəlir. Meme coinlər və yüksək riskli tokenlər hələ də bazarda mövcudluğunu saxlayır, lakin onların yaratdığı volatillik fonunda daha ehtiyatlı investisiya strategiyaları üstünlük qazanır.
Digər mühüm istiqamət dövlət tənzimləmələrinin güclənməsi ilə bağlıdır. ABŞ, Avropa İttifaqı və Asiya regionunda kriptoaktivlər üzrə hüquqi çərçivələrin sərtləşdirilməsi bazarın şəffaflığını artırmaq məqsədi daşıyır. Bu proses bir tərəfdən institusional investorların etimadını gücləndirsə də, digər tərəfdən anonimlik və tam sərbəstlik prinsiplərinə üstünlük verən iştirakçılar üçün müəyyən məhdudiyyətlər yaradır.
Eyni zamanda, stablecoinlər və rəqəmsal ödəniş sistemləri üzrə inkişaf tendensiyası da diqqət çəkir. Bir çox maliyyə institutu blokçeyn texnologiyasını yalnız investisiya aləti kimi deyil, həm də ödəniş və maliyyə əməliyyatlarının optimallaşdırılması vasitəsi kimi tətbiq etməyə çalışır. Bu isə texnologiyanın real iqtisadi sistemə inteqrasiyasını sürətləndirir.
Kriptovalyuta bazarı artıq yalnız innovativ texnologiya sahəsi deyil, qlobal maliyyə sisteminin formalaşmaqda olan mühüm komponentlərindən biri kimi qiymətləndirilir. Bununla belə, yüksək volatillik, geosiyasi faktorlar və tənzimləyici dəyişikliklər bu bazarın gələcək inkişaf trayektoriyasını hələ də müəyyən dərəcədə qeyri-müəyyən saxlayır”.