.jpg)
"Yay aylarında hava temperaturunun yüksəlməsi uşaqların həm iştahasına, həm də ümumi sağlamlığına birbaşa təsir edir. Bu dövrdə orqanizmdə maye itkisi artır, həzm sistemi daha həssas olur və qida seçimi daha diqqətlə aparılmalıdır. Düzgün qurulmuş yay qidalanması uşağı həm susuzlaşmadan qoruyur, həm də onun inkişafını dəstəkləyir".
Bu barədə SİA-ya açıqlamasında pediatr Elşən Tağıyev deyib.
Onun sözlərinə görə, ilk və ən vacib məsələ maye qəbuludur. İsti havalarda uşaqlar daha çox tərləyir və nəticədə bədən su itirir: "Bu səbəbdən gün ərzində kifayət qədər su içilməsi mütləqdir. Xüsusilə 6 aydan böyük uşaqlara əlavə su verilməlidir. Daha böyük uşaqlarda isə şəkərsiz kompotlar, ayran və ev şəraitində hazırlanmış təbii içkilər yaxşı alternativdir. Qazlı və şəkərli içkilər isə susuzluğu azaltmaq əvəzinə onu daha da artırır.
Yay mövsümündə qidalar daha yüngül və asan həzm olunan olmalıdır. Yağlı, qızardılmış və ağır yeməklər həzm sistemini yükləyir və uşaqlarda narahatlıq yarada bilər. Bunun əvəzinə buxarda bişmiş yeməklər, şorbalar, tərəvəz əsaslı qidalar və yüngül menyular seçilməlidir.
Meyvə və tərəvəzlər yay qidalanmasının əsas hissəsini təşkil edir. Qarpız, yemiş, şaftalı və ərik kimi mövsümi meyvələr həm vitaminlərlə zəngindir, həm də yüksək su tərkibinə malikdir. Bu isə uşağın orqanizminin hidrasiyasına kömək edir. Lakin bu məhsulların yaxşı yuyulması və gigiyenik qaydalara riayət olunması vacibdir.
Zülal qəbulu da unudulmamalıdır. Uşağın inkişafı üçün zülal əsas qida komponentlərindən biridir. Yayda ağır qırmızı ət yeməkləri əvəzinə daha yüngül seçimlərə üstünlük verilməlidir. Toyuq əti, balıq, yumurta və süd məhsulları həm daha rahat həzm olunur, həm də lazım olan qida dəyərini təmin edir.
Qida təhlükəsizliyi yay aylarında xüsusi diqqət tələb edir. İsti hava qidaların tez xarab olmasına səbəb olur. Açıqda satılan, düzgün saxlanmayan və uzun müddət otaq temperaturunda qalan qidalar uşaqlar üçün risklidir. Yeməklər təzə hazırlanmalı və uyğun şəraitdə saxlanmalıdır.
Şirniyyat və hazır içkilərin istifadəsi də məhdudlaşdırılmalıdır. Yayda uşaqlar daha çox dondurma, şirin içkilər və qazlı məhsullara meyl edir. Lakin bu məhsullar həm iştahanı azaldır, həm də sağlamlığa mənfi təsir göstərə bilər. Onların əvəzinə daha təbii və faydalı alternativlər seçmək daha doğrudur".