“Məktəblərdə baş verən xoşagəlməz hadisələr təkcə təhsil müəssisəsinin daxilində məhdudlaşmır, bu hallar həm məktəb daxilində, həm də kənarda müxtəlif səbəblərlə baş verə bilər”.
SİA xəbər verir ki, bu sözləri Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov media üçün keçirilən brifinqdə çıxışı zamanı deyib.
O bildirib ki, təhlükəsizlik tədbirlərinə baxmayaraq, mühafizə xidmətləri və nəzarət mexanizmləri tam təminat vermir: “Bu, yalnız texniki vasitələrlə tam həll olunan məsələ deyil və qlobal xarakter daşıyır”.
Eşqi Bağırov qeyd edib ki, məktəblərdə əsas məsuliyyət bütün pedaqoji heyətin üzərinə düşür: “Direktor, direktor müavini, psixoloq, sinif rəhbəri və müəllim öz vəzifəsini vicdanla yerinə yetirməlidir”.
Onun sözlərinə görə, əsas vəzifə qaydaların hazırlanması, maarifləndirmə və təlimlərin təşkili ilə təhlükəsiz mühitin gücləndirilməsidir.
O əlavə edib ki, həyata keçirilən tədbirlər bir çox risklərin qarşısını alır, lakin bu cür hadisələri tamamilə aradan qaldırmaq mümkün deyil: “Məqsəd maksimum təhlükəsiz və sağlam təhsil mühiti yaratmaqdır”.