...Şimali Karolinada on səkkiz yaşlı Angelina Han Hiks həbs edilib.
SİA-nın xarici qaynaqlardan əldə etdiyi məlumata görə, o, qətl törətmək və ölümcül silahla hücum etməkdə ittiham olunur.
Məhkəmə sənədlərinə görə, o və işdə "Angel" və "Tegan" təxəllüsləri ilə tanınan iki şəxslə əlbir olub Texasın Hyuston şəhərindəki Congregation Beth Israel sinaqoquna hücum etməyi planlaşdırırmışlar.
Sui-qəsdçilər binaya maşınla girib “mümkün qədər çox yəhudini” öldürməyi planlaşdırırmışlar.
Sənədlərə görə, hücum 2028-ci ilə planlaşdırılmışdı, lakin Federal Təhqiqat Bürosu yaxın gələcəkdə baş verə biləcək terror hücumu ilə bağlı narahatlıqların olduğunu bildirib.
Hiks 22 apreldə Leksinqtonda Devidson şəhər şerif ofisi və Federal Təhqiqat Bürosunun köməyi ilə həbs edilib.
Federal Təhqiqat Bürosunun direktoru Keş Patel hüquq-mühafizə orqanlarının sürətli hərəkətinin "çox güman ki, həyatları xilas etdiyini" vurğulayıb.
Devidson Şəhər Hakimi Karlton Terri qızın iki əlbirinin hələ də azadlıqda olduğunu və kimliyinin müəyyən edilmədiyini qeyd edərək, girov məbləğini 10 milyon dollar olaraq təyin edib.
Adının çəkilməsini istəməyən təqsirləndirilən şəxsin atası ittihamları uydurma və həddindən artıq şişirdilmiş adlandırıb. O, qızının "yaxşı qız" olduğunu və "heç bir təhlükə yaratmadığını", hadisənin onun "internetdə fantaziya oyunu oynaması" ilə əlaqəli olduğunu söyləyib.
O, həmçinin həbs səbəbindən Angelinanın iki həftəsi qalmış orta məktəbi bitirə bilməyəcəyini söyləyib.
Texasın ən qədim yəhudi icması olan Beth Israel Sinaqoqu və onun kampusunda yerləşən Şlenker İbtidai Məktəbi təhlükəsizliklə bağlı narahatlıqlar səbəbindən çərşənbə günü kampusu bağlamaq qərarına gəlib.
Böyük Hyuston Yəhudi Federasiyası yerli hüquq-mühafizə orqanlarının şəhərdəki yəhudi müəssisələri ətrafında patrul xidmətini artırdığını bildirib.
Hiksin həbsi Yaxın Şərqdə gərginliyin artması fonunda baş verir: Amerika mediasının xəbər verdiyi kimi, ABŞ-İsrail müharibəsi səbəbindən Amerika yəhudi icmalarına təhlükə artıb. Bundan əlavə, Hyuston polisi yəhudiləri öldürmək planı ilə bağlı oxşar ittihamla daha bir 16 yaşlı qızın həbs olunduğunu elan edib, baxmayaraq ki, iki iş arasında rəsmi əlaqə hələ təsdiqlənməyib.
Əli Babayev