Onun sözlərinə görə, Azərbaycan Respublikasının Prezidenti İlham Əliyev Antalya Diplomatiya Forumu çərçivəsində türkiyəli həmkarı Rəcəb Tayyib Ərdoğan və Pakistanın Baş naziri Məhəmməd Şahbaz Şəriflə də bir araya gəldi:"Aprelin 17-də Antalyada Azərbaycan Respublikasının Prezidenti İlham Əliyevlə Türkiyə Respublikasının Prezidenti Rəcəb Tayyib Ərdoğanın görüşü keçirildi. Bu görüş sadə ikitərəfli müzakirədən çox-çox artığını ifadə edirdi. Bu, iki qardaş dövlətin dünya səhnəsindəki yüksələn rolunun növbəti təsdiqi idi. Görüş, Prezident Rəcəb Tayyib Ərdoğanın himayəsində, Türkiyənin Xarici İşlər Nazirliyinin ev sahibliyi ilə reallaşan 5-ci Antalya Diplomatiya Forumu çərçivəsində baş tutdu. Builki forum "Gələcəyi planlaşdırarkən qeyri-müəyyənliklərin öhdəsindən gəlmək" mövzusunda təşkil edilmişdi. 150-dən çox ölkənin yüksəksəviyyəli nümayəndələrini bir araya gətirən bu məkanda iki prezidentin görüşməsi öz-özlüyündə güclü bir mesaj daşıyırdı".
Bu sözləri SİA-ya açıqlamasında deputat Naqif Həmzəyev deyib.
Onun sözlərinə görə, Azərbaycan Respublikasının Prezidenti İlham Əliyev Antalya Diplomatiya Forumu çərçivəsində türkiyəli həmkarı Rəcəb Tayyib Ərdoğan və Pakistanın Baş naziri Məhəmməd Şahbaz Şəriflə də bir araya gəldi:
"Bu üçtərəfli görüşün özünəməxsus simvolik dəyəri var idi. Türkiyənin xarici işlər naziri Hakan Fidan Türkiyə, Azərbaycan və Pakistan liderlərinin bu birlikdə nümayiş etdirdiyi səmimiyyətin bütün dünyaya mesaj olduğunu vurğuladı. Üç müsəlman, türkdilli dünya ilə dərin tarixi bağları olan dövlətin başçılarının bu cür görüşməsi, yeni çoxqütblü dünyada alternativ ittifaq arxitekturasının formalaşdığını göstərir. Görüşün ən həssas və strateji mövzularından biri, şübhəsiz ki, Cənubi Qafqazda sülh prosesi oldu. Prezident Rəcəb Tayyib Ərdoğan çıxışında Türkiyə ilə Ermənistan arasında davam edən normallaşma prosesinin Azərbaycanla əlaqəli şəkildə aparıldığını xüsusi vurğuladı. Bu bəyanat Ankaranın Bakıya verdiyi aydın siyasi siqnaldır: "Türkiyə heç bir addımı Azərbaycanın razılığı olmadan atmayacaq". Türkiyənin bu koordinasiyalı yanaşması, həm də Asiya ilə Avropa arasındakı ticarətdə etibarlı marşrut kimi xarakterizə edilən Xəzər üzərindən keçən Şərq-Qərb — Orta Dəhliz təşəbbüsünə dəstəklə birgə dəyərləndirildi. Düşünürəm ki, görüşdə müzakirə olunan məsələlər sırasında Cənubi Qafqazdakı proseslər və Azərbaycan-Ermənistan sülh danışıqları ilə yanaşı, Orta Şərqdəki vəziyyət, Rusiya-Ukrayna müharibəsi konteksindəki atəşkəs məsələləri, habelə Türk Dövlətləri Təşkilatı çərçivəsindəki əməkdaşlıq istiqamətləri də mühüm yer tutdu.
Prezident Ərdoğan Türk Dövlətləri Təşkilatının fəaliyyətinin daha da inkişaf etdiyini vurğulayaraq bildirdi ki, bu ilin son aylarında Türkiyədə keçiriləcək XIII Türk Dünyası Zirvəsində yeni dövrdə təşkilatın sədrliyi Azərbaycandan təhvil alınacaq. Bu bəyanat göstərir ki, Azərbaycan növbəti illərdə türk dünyasının liderlik arxitekturasında daha mərkəzi rol oynayacaq. Prezident Əliyev isə Türk Dövlətləri Təşkilatının bu gün dünya miqyasında böyük nüfuz qazandığını, beynəlxalq mövqelərin güclənməsi üçün müştərək səylərin vacibliyini vurğuladı.
44 günlük İkinci Qarabağ müharibəsinin ilk anlarından qardaş Türkiyənin Azərbaycana siyasi və mənəvi dəstək verdiyi, Prezident Rəcəb Tayyib Ərdoğanın "Azərbaycan tək deyil" çağırışının dünyaya ciddi mesaj olduğu xatırladıldı. Bu tarixi fon, iki ölkə arasındakı münasibətin adi müttəfiqlik çərçivəsini aşdığını açıq şəkildə ortaya qoyur. Azərbaycan-Türkiyə birliyinin bu gün təkcə bölgə üçün deyil, bütövlükdə Avrasiya üçün önəmli amilə çevrildiyi qeyd edildi. Türkiyənin güclü sənaye potensialı, iqtisadi gücü və hərbi qüdrəti türk dünyasına mənsub olan hər bir insanın sevincinə çevrilir.
Prezident Əliyevin vurğuladığı kimi, dəyişən dünyada güc amili ön plana çıxmışdır — dünyanın ayrı-ayrı regionlarında güc mərkəzləri BMT qətnamələrinə məhəl qoymadan dövlətlərə qarşı aqressiyalar həyata keçirirlər. Bu mənada Antalya görüşü iki lider arasındakı ikitərəfli məsələlərin müzakirəsi ilə yanaşı qlobal çağırışlara ortaq cavab axtarışının da məkanına çevrildi.
Antalya görüşü bir neçə əsas mesaj verdi. Birincisi, Türkiyə-Azərbaycan əlaqələri müttəfiqlik səviyyəsindən qardaşlıq modelinə yüksəlmiş, bu model region üçün nümunəyə çevrilmişdir. İkincisi, iki ölkə Ermənistanla normallaşma prosesini əlaqəli şəkildə idarə etmək üçün ortaq çərçivə formalaşdırır. Üçüncüsü, Azərbaycan Türk Dövlətləri Təşkilatında yeni bir liderlik dövrünün astanasındadır. Nəhayət, Prezident İlham Əliyevin Türkiyəyə işgüzar səfəri iki dost, qardaş, müttəfiq ölkənin dünyaya nümunə olan münasibətlərinin növbəti təqdimatıdır — hər bir görüş əlaqələrin inkişafında mühüm mərhələ kimi dəyərləndirilir".