...Amerika korporasiyası Apple Rusiyaya qarşı sanksiyaları pozduğuna görə təxminən 490.000 dollar cərimə alıb.
SİA-nın xarici qaynaqlardan əldə etdiyi məlumata görə, bu barədə Böyük Britaniyanın Maliyyə Sanksiyalarına Nəzarət Ofisi (OFSI) məlumat verib.
Cərimə, şirkətin İrlandiyadakı törəmə şirkəti olan Apple Distribution Limited-in 2022-ci ilin iyun və iyul aylarında Rusiyanın Okko yayım xidmətinə köçürdüyü təxminən 800.000 dollarlıq iki ödənişdən irəli gəlirdi.
2022-ci ilin may ayına qədər Okko sanksiyalara məruz qalan Sberbank-a məxsus idi. Xidmət daha sonra sanksiyalara məruz qalan Yeni İmkanlar ASC-yə satıldı.
Buna baxmayaraq, Apple sanksiyalar tətbiq edildikdən sonra köçürmələri davam etdirdi.
Tənzimləyici qeyd edib ki, şirkətin ödənişlərdən ən azı birini ləğv etmək imkanı var idi, lakin bunu etməyib.
Həmçinin məlum oldub ki, 2022-ci ilin aprel ayında Apple Okko-ya 1,5 milyon dollardan çox pul köçürüb, halbuki xidmət hələ də Sberbank tərəfindən idarə olunurdu. O dövrdə mövcud olan daha yumşaq qaydalara görə bu əməliyyatlar cərimələrə məruz qalmırdı.
OFSI, Apple şirkətinin tərtibatçıların öz bəyannamələrinə əsaslandığını və Rusiya tətbiqlərinin sahibləri haqqında əlavə məlumat tələb etmədiyini və bunun pozuntuya səbəb olduğunu vurğuladı.
İlkin cərimə təxminən 750.000 dollar ola bilərdi, lakin şirkət könüllü olaraq pozuntu barədə məlumat verdiyi və səlahiyyətlilərlə əməkdaşlıq etdiyi üçün azaldıldı.
Apple, Okko şirkətinin sanksiya edilmiş statusundan xəbərsiz olduğunu bildirdi və qanuna ciddi şəkildə əməl etdiyini vurğuladı.
Şirkət 2022-ci ilin mart ayında Rusiyada cihaz satışını dayandırdı, lakin onun tətbiq mağazası fəaliyyətini davam etdirir.
Əli Babayev