...SİA-nın əldə etdiyi məlumata görə, rusiyalı nevroloq Maksim Pankov URA.RU xəbər agentliyinə bildirib ki, sol tərəf üstə yatmaq yuxuda kabus görməyə əsas səbəbi deyil.
O izah edib ki, yuxu vəziyyəti gecə istirahəti zamanı özünüzü necə hiss etdiyinizə təsir edə bilər, amma yuxularınıza təsir etmir.
Yuxular daha çox sinir sisteminizdən və həyat tərzinizdən asılıdır.
Həkim izah edib ki, “...kabusların müxtəlif səbəbləri ola bilər, o cümlədən stress, narahatlıq, xroniki yuxu çatışmazlığı və depressiya. Lakin, bu cür yuxuların olub-olmaması müəyyən bir yuxu vəziyyətindən asılı olmaya bilər”.
O əlavə edib ki, ən yaxşı yuxu vəziyyəti asanlıqla yuxuya getdiyiniz və səhər özünüzü dincəlmiş hiss etdiyiniz vəziyyətdir.
Bununla belə, müəyyən insan qrupları üçün bəzi tövsiyələr var.
Məsələn, boyun ağrısı, burun tıkanıklığı və ya çiyin problemləri olanlar arxası üstə yatmağa üstünlük verməlidirlər.
Bu, həmçinin üzlərində yeni qırışların əmələ gəlməsindən narahat olanlar üçün də tövsiyə olunur. Arxası üstə yatmaq dərinin yastıqla təmas miqdarını və yaratdığı təzyiqi azaldır. Lakin, xorultunu azaltmaq, ürək yanmasını aradan qaldırmaq və ya bel ağrısını yüngülləşdirmək istəyirsinizsə, yanınız üstə yatmaq daha yaxşıdır.
Pankov qeyd edib ki, hamilə qadınlar sağ tərəfləri üstə yatmalıdırlar, çünki bu, daxili orqanlara təzyiqi azaldacaq. Nevroloq izah edib ki, insanın istirahət etdiyi mühit də yuxunun keyfiyyətinə təsir göstərir.
Havanın temperaturu sərin, orta rütubətlə olmalıdır. Bundan əlavə, otaq qaranlıq və sakit olmalıdır.
Yatmazdan iki-üç saat əvvəl kofein, spirtli içki və elektron cihazlardan çəkinin.
Döşək və yastığın rahatlığı, eləcə də sabit yatmaq və oyanmaq vaxtı da vacibdir.
Nazlı Almuradova