Onun sözlərinə görə, tədbirdə müxtəlif ölkələrin enerji nazirləri, beynəlxalq maliyyə institutlarının nümayəndələri, enerji şirkətlərinin rəhbərləri və ekspertlər iştirak ediblər:“Cənub Qaz Dəhlizi Məşvərət Şurası çərçivəsində nazirlərin 12-ci iclası və Yaşıl Enerji Məşvərət Şurası çərçivəsində nazirlərin 4-cü iclası Bakıda keçirilib”.
Bu sözləri SİA-ya açıqlamasında politoloq Züriyyə Qarayeva bildirib.
Onun sözlərinə görə, tədbirdə müxtəlif ölkələrin enerji nazirləri, beynəlxalq maliyyə institutlarının nümayəndələri, enerji şirkətlərinin rəhbərləri və ekspertlər iştirak ediblər:
” Görüşün əsas məqsədi regionda enerji əməkdaşlığının genişləndirilməsi, enerji təhlükəsizliyinin gücləndirilməsi və yeni layihələr üzrə tərəfdaşlığın inkişaf etdirilməsi olub.
İclas zamanı Avropanın enerji təhlükəsizliyinin təmin olunmasında Cənub Qaz Dəhlizi layihəsinin rolu xüsusi vurğulanıb. Bildirilib ki, bu layihə Azərbaycanın zəngin enerji resurslarının beynəlxalq bazarlara çıxarılmasında mühüm platforma rolunu oynayır və Avropanın qaz təchizatının şaxələndirilməsinə töhfə verir. Son illərdə Avropa ölkələrinin Azərbaycan qazına olan tələbatının artması isə bu əməkdaşlığın daha da genişləndirilməsini zəruri edir.
Müzakirələr zamanı enerji infrastrukturunun genişləndirilməsi, yeni qaz yataqlarının istismara verilməsi və mövcud boru kəmərlərinin ötürücülük gücünün artırılması məsələləri də diqqət mərkəzində olub. Eyni zamanda, enerji layihələrinin maliyyələşdirilməsi, uzunmüddətli tərəfdaşlıq mexanizmləri və region ölkələri arasında enerji əməkdaşlığının yeni istiqamətləri müzakirə edilib.
Bununla yanaşı, tədbir çərçivəsində yaşıl enerji və bərpa olunan enerji mənbələrinin inkişafı məsələləri də xüsusi yer tutub. Yaşıl Enerji Məşvərət Şurasının iclasında günəş, külək və digər bərpa olunan enerji layihələrinin həyata keçirilməsi, regional enerji bazarlarında “yaşıl keçid” prosesinin sürətləndirilməsi və ekoloji dayanıqlı enerji sistemlərinin qurulması istiqamətində əməkdaşlıq imkanları dəyərləndirilib.
Azərbaycan yalnız ənənəvi enerji resurslarının ixracatçısı kimi deyil, həm də bərpa olunan enerji sahəsində yeni təşəbbüslərlə çıxış edən ölkə kimi regionda mühüm rol oynayır. Xüsusilə ölkənin külək və günəş enerjisi potensialının yüksək olması gələcəkdə yaşıl enerjinin istehsalı və ixracı üçün geniş imkanlar yaradır.
Bərpa olunan enerji sahəsində əməkdaşlığın gücləndirilməsi və yeni layihələrin reallaşdırılması istiqamətində tərəflər arasında dialoqun davam etdirilməsinin vacibliyi vurğulanıb. Bildirilib ki, bu kimi görüşlər regionda enerji sabitliyinin təmin olunmasına, beynəlxalq tərəfdaşlığın genişlənməsinə və dayanıqlı enerji gələcəyinin formalaşmasına mühüm töhfə verir”.