"Naxçıvan hadisəsi regionda təhlükəsizlik müzakirələrini yenidən gündəmə gətirir" - ŞƏRH EDİLDİ

"Naxçıvan hava limanı istiqamətində İran ərazisindən uçan dronun partlaması ilə bağlı yayılan məlumatlar regionda təhlükəsizlik məsələlərini yenidən gündəmə gətirib. Bu cür hadisələr yalnız iki ölkə arasındakı münasibətlər baxımından deyil, ümumilikdə Cənubi Qafqazda geosiyasi balansın qorunması baxımından da ciddi əhəmiyyət kəsb edir".

Bu sözləri SİA-ya açıqlamasında politoloq Elşad Həsənov deyib.

Onun sözlərinə görə, Azərbaycan və İran uzun illərdir ki, ortaq sərhədi, iqtisadi əlaqələri və tarixi münasibətləri olan qonşu dövlətlərdir və belə hadisələr regionda etimad mühitinə mənfi təsir göstərə bilər: "Azərbaycan tərəfi indiyə qədər dəfələrlə bəyan edib ki, ölkə öz ərazisinin üçüncü dövlətlərə qarşı istifadə olunmasına imkan vermir və qonşu ölkələrlə münasibətlərdə qarşılıqlı hörmət prinsipinə üstünlük verir. Rəsmi Bakının həm diplomatik bəyanatlarında, həm də praktiki addımlarında bu siyasət aydın şəkildə görünür. Xüsusilə regionda gərginlik yaradan beynəlxalq proseslər fonunda Azərbaycan balanslaşdırılmış və ehtiyatlı xarici siyasət yürütməyə çalışır. İranla münasibətlər həmişə mürəkkəb və çoxşaxəli olub. Bir tərəfdən iqtisadi, enerji və nəqliyyat sahələrində əməkdaşlıq imkanları mövcuddur, digər tərəfdən isə siyasi və ideoloji fərqlər zaman-zaman gərginlik yaradır. Xüsusilə İranda yaşayan milyonlarla azərbaycanlının hüquqları ilə bağlı mövzular Azərbaycan cəmiyyətində həssas məsələ kimi qəbul olunur və bu faktor münasibətlərə əlavə emosional yük gətirir.

Belə bir vəziyyətdə mümkün insidentlərin düzgün araşdırılması və diplomatik kanallar vasitəsilə izah edilməsi son dərəcə vacibdir. Əgər hər hansı hərbi və ya texniki hadisə baş veribsə, bunun səbəbləri, məsuliyyət məsələsi və gələcəkdə belə halların qarşısının alınması üçün mexanizmlər müəyyənləşdirilməlidir. Çünki regionda sabitlik yalnız qarşılıqlı etimad və açıq dialoq vasitəsilə qoruna bilər. Eyni zamanda bu hadisə region dövlətlərinə təhlükəsizlik sistemlərinin gücləndirilməsinin vacibliyini də xatırladır. Müasir dövrdə pilotsuz uçuş aparatlarının geniş yayılması dövlət sərhədlərinin qorunmasını daha mürəkkəb hala gətirib. Buna görə də həm hərbi texniki imkanların artırılması, həm də regional təhlükəsizlik üzrə əməkdaşlıq mexanizmlərinin yaradılması aktual məsələyə çevrilir. Azərbaycan xarici siyasətdə praqmatik və balanslı mövqe tutmağa çalışır. Rəsmi Bakı regionda gərginliyin artmasında maraqlı deyil və qonşu dövlətlərlə münasibətlərin sabit qalmasını prioritet hesab edir. Bu baxımdan belə hadisələrin diplomatik müstəvidə araşdırılması və siyasi gərginliyə çevrilməsinin qarşısının alınması həm Azərbaycan, həm də region üçün daha məqsədəuyğun yanaşma hesab olunur".