...Rəqəmlər və düsturlar bəzi uşaqları qorxudur, digərlərini isə valeh edir. Bəs niyə bəzi məktəblilər riyaziyyatda uğur qazanmaqda çətinlik çəkirlər?
SİA Knife-yə istinadən xəbər verir ki, Stanford Universitetinin (ABŞ) tədqiqatçıları bu suala gözlənilməz cavab tapıblar.
Alimlər yeddi-on yaş arası 112 uşaqla təcrübə aparıblar. Bütün məktəblilərdən rəqəmləri və simvolları müqayisə etməklə bağlı bir neçə sadə məsələni həll etmələri istənilib. Əvvəlcə onlar iki ədəddən hansının daha böyük olduğunu müəyyən etməli olublar.
Daha sonra təcrübəçilər onlara nöqtə qruplarını göstərib eyni sualı yenidən veriblər.
Təcrübə vasitəsilə tədqiqatçılar müxtəlif uşaqların beyinlərinin rəqəmləri və simvolik rəqəmləri necə tanıdığını başa düşə biliblər.
Mütəxəssislər yalnız cavablarının düzgünlüyünü deyil, həm də uşaqların testlər boyunca səhvlərindən dərs çıxara bilib-bilmədiklərini qiymətləndiriblər.
Nəticələr aydın bir qanunauyğunluq ortaya qoyub. Məlum olub ki, riyaziyyatda çətinlik çəkən uşaqlar uğursuzluqdan sonra problemləri həll etmək üçün yeni yollar axtarmağa daha az meyllidirlər.
Alimlərin fikrincə, bu, onları inkişaf etmiş riyazi qabiliyyətləri olan digər şagirdlərdən fərqləndirən şeydir. Tədqiqatın aparıcı müəllifi Hesan Çan izah edib ki, “...bu çatışmazlıqlar təkcə riyaziyyat bacarıqları ilə əlaqəli deyil və digər kontekstlərdə də özünü göstərə bilər”.
Komanda indi hipotezlərini daha müxtəlif insan nümunələri üzərində sınaqdan keçirmək istəyir. Bəlkə də onların tədqiqatı akademik çətinlikləri olan uşaqlarla işləmək üçün yeni yanaşmaların hazırlanmasına gətirib çıxaracaq.
Əli Babayev