Onun sözlərinə görə, görüş zamanı liderlər Azərbaycan-Ukrayna əlaqələrinin müxtəlif sahələr üzrə inkişaf perspektivlərini və qarşılıqlı maraq doğuran beynəlxalq məsələləri geniş şəkildə müzakirə etdilər:“Azərbaycan Respublikasının Prezidenti İlham Əliyevin fevralın 14-də Münxendə Ukrayna Prezidenti Volodimir Zelenski ilə görüşü ikitərəfli münasibətlərin möhkəmləndirilməsi və regional məsələlərin müzakirəsi baxımından mühüm əhəmiyyət kəsb edir”. Bu sözləri SİA-ya açıqlamasında politoloq Sahil Kərimli bildirib. Onun sözlərinə görə, görüş zamanı liderlər Azərbaycan-Ukrayna əlaqələrinin müxtəlif sahələr üzrə inkişaf perspektivlərini və qarşılıqlı maraq doğuran beynəlxalq məsələləri geniş şəkildə müzakirə etdilər:
“Prezident Volodimir Zelenski görüş zamanı Azərbaycandan Ukraynaya göstərilən humanitar dəstəyə xüsusi diqqət ayırdı. O, Azərbaycanın münaqişədən zərər çəkmiş vətəndaşlara, xüsusilə uşaqlara göstərdiyi qayğı və dəstəyə görə minnətdarlığını ifadə etdi. Bu, ölkələr arasında həm humanitar əməkdaşlığın, həm də dostluq əlaqələrinin güclənməsinə xidmət edən mühüm addımdır. Azərbaycan tərəfindən göstərilən dəstək, o cümlədən humanitar yardımın təşkili, uşaq sığınacaqlarının təmin olunması və digər sosial təşəbbüslər Ukraynada müharibədən təsirlənmiş əhalinin vəziyyətinin yüngülləşdirilməsinə yönəlib.
Görüş zamanı həmçinin iqtisadi, ticarət və enerji sahələrində əməkdaşlıq perspektivləri müzakirə olundu. Liderlər qarşılıqlı ticarət dövriyyəsinin artırılması, investisiya imkanlarının genişləndirilməsi və regional nəqliyyat-logistika layihələrinin birgə həyata keçirilməsi imkanlarını nəzərdən keçirdilər. Azərbaycan Prezidentinin vurğuladığı kimi, bu təşəbbüslər yalnız iki ölkə arasında iqtisadi əlaqələrin güclənməsinə deyil, həm də regionda stabilliyin və əməkdaşlığın dərinləşməsinə xidmət edir.
Bundan əlavə, görüş zamanı beynəlxalq təhlükəsizlik, regional sabitlik və münaqişələrin həlli kimi məsələlər də müzakirə olundu. Hər iki dövlət rəhbəri regional və qlobal miqyasda dialoqun, çoxtərəfli əməkdaşlığın vacibliyini vurğuladılar və birgə təşəbbüslərin koordinasiyası üçün mexanizmlərin inkişaf etdirilməsinin zəruriliyini qeyd etdilər.
Fevralın 14-də Münxendə keçirilmiş Azərbaycan-Ukrayna liderlərinin görüşü ölkələr arasında strateji əməkdaşlığın möhkəmlənməsinə, humanitar və sosial dəstək sahəsində praktiki addımların təşkili və regional problemlərin həllinə yönəlmiş dialoqun genişləndirilməsinə xidmət edir. Bu görüş, həmçinin Azərbaycan Respublikasının beynəlxalq siyasətdə həm regional, həm də qlobal miqyasda məsuliyyətli və fəal tərəfdaş kimi mövqeyini bir daha nümayiş etdirir”.