ABŞ-ın vitse-prezidenti JD Vance İranla bağlı açıqlama verərək bildirib ki, bu ölkənin nüvə silahı əldə etməsinə yol verilməməlidir və bütün variantlar hələ də masadadır.
SİA xarici KİV -ə istinadən xəbər verir ki, Cenevrədə aparılan nüvə danışıqlarının bəzi məqamlarda müsbət irəlilədiyini qeyd etsə də, Prezident Donald Trampın bütün seçimləri nəzərdən keçirdiyini vurğulayıb.
JD Vance Amerika mətbuatına verdiyi açıqlamada Cenevrədə keçirilən İran danışıqlarını dəyərləndirib. O bildirib ki, Prezident Trampın İranla bağlı müxtəlif variantları var və ABŞ-ın çox güclü ordusu mövcuddur. Vance qeyd edib ki, Prezident bu gücdən istifadə etməyə hazır olduğunu artıq göstərib, eyni zamanda son dərəcə güclü diplomatik komandaya malikdir və bu diplomatik imkanlardan da istifadə etməyə hazırdır.
ABŞ-ın müəyyən qırmızı xətləri olduğunu deyən Vance, əsas məqsədlərinin İranın nüvə silahı əldə etməsinin qarşısını almaq olduğunu bildirib. Onun sözlərinə görə, əgər İran nüvə silahına sahib olarsa, bundan sonra bir çox başqa rejimlər də nüvə silahı əldə etməyə çalışacaq. O əlavə edib ki, bu məsələni diplomatik danışıqlar yolu ilə həll etmək istəsələr də, bütün variantlar hələ də gündəmdədir.
Vance danışıqların bəzi baxımdan yaxşı getdiyini vurğulayıb, lakin İran tərəfinin müəyyən edilmiş bəzi qırmızı xətləri hələ qəbul etməyə hazır olmadığını bildirib. Buna görə də danışıqların davam etdiriləcəyini deyən vitse-prezident qeyd edib ki, diplomatik prosesin bitdiyini elan etmək səlahiyyəti Prezidentə məxsusdur. O ümid etdiklərini bildirib ki, bu mərhələyə gəlib çatmazlar, lakin qərarın verilib-verilməyəcəyi Prezidentin öz seçimindən asılı olacaq.