...Astronomlar görünməmiş bir fenomen qeydə alıblar: 41P/Tuttle-Giacabini-Kresak kometi qəfildən fırlanmağı dayandırdı və sonra istiqamətini dəyişdi. Bu davranış Günəş sistemində müşahidə edilən ilk haldır.
SİA-nın əldə etdiyi məlumata görə, bu barədə The New York Times yazır.
Komet Los-Ancelesdəki Kaliforniya Universitetinin astronomu Devid Cevitt tərəfindən 2017-ci ildə çəkilmiş Habl Kosmik Teleskopunun şəkillərindən istifadə edərək öyrənilib. Əvvəllər mütəxəssislər kometin fırlanma sürətində kəskin azalma müşahidə etmişdilər, lakin yeni məlumatlar göstərir ki, 2017-ci ilin may və dekabr ayları arasında fırlanma tamamilə dayanıb və istiqamətini dəyişib.
Buna güclü qaz şırnaqları səbəb olur və onlar şlanqa bənzər bir şırnaq axını yaradır.
Bu şırnaqlar kometin səthi Günəşə yaxınlaşdıqca qızdıqda və buzunu qaza çevirdikdə əmələ gəlir.
Bu, adətən, fırlanma dövründə yalnız kiçik dəyişikliklərə səbəb olur və cəmi bir neçə dəqiqə davam edir.
Lakin 41P fırlanma sürətini 20 saatdan 46 saata, daha sonra isə 14 saata qədər dəyişdi ki, bu da rekord göstəricidir. Alimlər inanırlar ki, oxşar proseslər kiçik kometlərin yoxa çıxmasını izah edə bilər.
Əgər reaktiv axınlar fırlanma sürətini çox artırarsa, obyekt mərkəzdənqaçma qüvvəsinin təsiri altında parçalana bilər. ...Kometlər öz fırlanmaları səbəbindən sözün əsl mənasında dağıla bilərlər,-deyə Cevit bildirir.
41P 2028-ci ildə yenidən Günəşə yaxınlaşacaq və astronomlar müşahidələri davam etdirməyi gözləyirlər.
Çilidəki Vera Rubin Rəsədxanası da daxil olmaqla yeni teleskopların oxşar xaotik dəyişikliklərə məruz qalan digər kometləri müəyyən etməyə kömək edəcəyi gözlənilir.
Nazlı Almuradova