Daxili İşlər Nazirliyi və Səhiyyə Nazirliyi Sürətli Reaksiya Tibbi Qrupunun (SRQ) yaradılmasında iştirak edəcək.
SİA xarici KİV-ə istinadən xəbər verir ki, Ermənistanda Sürətli Reaksiya Tibbi Qrupu (SRQ) yaradılacaq. Müvafiq qərar cümə axşamı hökumət iclasında qəbul edilib. Qərarın əsaslandırmasında deyilir:
"Sürətli Reaksiya Tibbi Qrupu (SRQ) fövqəladə halların qurbanlarına yardım və tibbi xidmət göstərə bilər, eləcə də Ermənistandan kənarda beynəlxalq humanitar missiyalarda iştirak edə bilər". Qərara əsasən, bu qrup lazımi avadanlıq, təchizat və s. ilə təchiz olunmalı və istənilən yerdə yerləşdirilməsi və qurbanlara lazımi yardımın göstərilməsi üçün lazım olan hər şeyə malik olmalıdır.
SRQ-nin fəaliyyəti üçün bütün zəruri avadanlıqların alınması dövlət büdcəsindən Səhiyyə Nazirliyinə ayrılan vəsait hesabına ödəniləcək. Beynəlxalq humanitar missiyaların bir hissəsi olaraq Ermənistandan kənara səyahət üçün əlavə xərclər çəkiləcək.
SRQ-nin yaradılmasında Səhiyyə Nazirliyi və Daxili İşlər Nazirliyi iştirak edəcək.
Sürətli reaksiya qrupunun yaradılması üçün adekvat hüquqi bazanın təmin edilməsi məqsədilə Ermənistan Səhiyyə Nazirliyi təsdiq üçün Ermənistan Parlamentinə "Tibbi yardım və dövlət xidmətləri haqqında qanuna dəyişikliklər və əlavələr edilməsi haqqında" qanun layihəsi təqdim edib.