"Bu, Azərbaycanın beynəlxalq imicini gücləndirir" - ŞƏRH EDİLDİ

"Prezidentin Birləşmiş Ərəb Əmirliklərinə səfərinin xarici mediada geniş işıqlandırılması Azərbaycanın beynəlxalq imicinin formalaşması və ölkənin xarici siyasət prioritetlərinin dünya ictimaiyyətinə çatdırılması baxımından mühüm əhəmiyyət daşıyır. Müasir beynəlxalq münasibətlər sistemində dövlətlərin yalnız həyata keçirdiyi siyasət deyil, bu siyasətin qlobal informasiya məkanında necə təqdim olunması da xüsusi rol oynayır".

Bu sözləri SİA-ya açıqlamasında politoloq Anar Əliyev deyib.

Onun sözlərinə görə, belə səfərlərin nüfuzlu xarici media orqanlarında geniş yayılması ilk növbədə Azərbaycanın regionda və beynəlxalq səviyyədə etibarlı tərəfdaş kimi qəbul olunmasına töhfə verir: "Xarici auditoriya bu cür xəbərlər vasitəsilə ölkənin siyasi sabitliyi, iqtisadi potensialı, investisiya imkanları və çoxtərəfli əməkdaşlığa açıq olması barədə dolğun təsəvvür əldə edir. Bu isə həm siyasi, həm də iqtisadi əlaqələrin genişlənməsi üçün əlavə imkanlar yaradır. BƏƏ ilə münasibətlərin strateji tərəfdaşlıq səviyyəsində inkişafı xüsusilə enerji, bərpa olunan enerji, logistika, investisiya və texnologiya sahələrində əməkdaşlıq perspektivlərini ön plana çıxarır. Xarici mediada bu istiqamətlərin vurğulanması Azərbaycanın iqtisadi şaxələndirmə siyasətini və qeyri-neft sektorunun inkişafına verdiyi önəmi beynəlxalq investorlar üçün daha görünən edir. Eyni zamanda, belə informasiya axını ölkənin diplomatik fəallığının və balanslaşdırılmış xarici siyasət kursunun nümayişi baxımından da əhəmiyyətlidir. Azərbaycanın müxtəlif regionlarla paralel və praqmatik əməkdaşlıq siyasəti aparması onun beynəlxalq sistemdə etibarlı və proqnozlaşdırıla bilən tərəfdaş kimi mövqeyini gücləndirir. Xarici mediada müsbət informasiya fonunun formalaşması isə ölkənin “yumşaq güc” imkanlarını genişləndirir.

Digər mühüm məqam ondan ibarətdir ki, bu cür səfərlərin geniş işıqlandırılması Azərbaycanın regional və qlobal layihələrdə oynadığı rolun beynəlxalq ictimaiyyətə daha aydın təqdim olunmasına xidmət edir. Nəticə etibarilə, informasiya məkanında aktivlik ölkənin siyasi nüfuzunun artmasına, yeni tərəfdaşlıqların qurulmasına və mövcud əlaqələrin daha da möhkəmlənməsinə şərait yaradır.

Beləliklə, Prezidentin BƏƏ səfərinin xarici mediada geniş yayılması yalnız informasiya xarakteri daşımır, həm də Azərbaycanın beynəlxalq mövqelərinin möhkəmlənməsinə, investisiya cəlbediciliyinin artmasına və ölkənin etibarlı tərəfdaş imicinin güclənməsinə xidmət edən mühüm siyasi və diplomatik amil kimi qiymətləndirilə bilər".